Chanchin thar thenkhat :

Inthlan ni sawn turin ngen

Mizoram-a Political Party hrang hrang MPCC, MNF, ZPM, ZNP leh PC Party te chuan nimin khan Chief Election Commissioner hnenah Serchhip Bial bye-election neih tura inthlan ni leh vote chhiar ni sawn tura ngenna Mizoram Chief Electoral Officer (CEO), P. Jawahar kal-tlangin an thehlut a. He an lehkha thehluh ah hian inthlan ni, April ni 17, 2021 chu Seventh Day Adventist, Church of God leh Assembly of God te ni serh a ni tih tarlangin, Vote chhiar ni, May ni 2, 2021 chu Pathianni anih bawk avangin Christian-te ni serh anih thu tarlangin sawn turin an ngen a ni.

Saitual DRO Office hawng

P&E Minister leh Tawi bialtu MLA ni bawk, R. Lalzirliana chuan nimin khan Keifang-a BN-RGSK Hall-ah Saitual District Research Officer's (DRO) Office a hawng a, DRO Office hawnna hunah hian P&E Minister chuan tunhnaia District thar 3 lo piang te chu kum 1998-a District 5 hawn te nena khaikhinin an vanneiin hma an sawn chak hle tih a sawi a. Hmasawnna hna atan ruahmanna engpawh siam turin statistics leh data rintlak neih a pawimawh thu sawiin, Saitual District chu District dangte aia lian ber emaw, District hausa ber emaw nih tum lovin, District hlim ber nih tum zawk turin a chah bawk.

Minister in BDO Office tlawh

Rural Development Department Minister, Lalruatkima chuan nimin khan Ngopa BDO Office tlawhin thawktute nen inkawmna an nei a, RD Minister chuan RD Block hnuaia hnathawkte an thawhrimna fakin, India ramah pawh Mizo-ram chu hnathawk tha zing a mi kan ni tih a sawi. Shyama Prasad Mukherji Rurban Mission (SPM-RM) hnuaiah RD Block 4 kan neih mek bakah Block dang khung belh leh turin sawrkar laipui-ah dilna thlen mek a nih thu pawh Minister chuan a sawi bawk. Ngopa RD Block hi kum 1974-a din a ni a, an Block huam chhungah hian khaw 13 a awm mek a ni.

Chief Minister in tlawh

Champhai District-a zin Chief Minister, Zo-ramthanga chuan nimin khan Champhai North bial huamchhunga hmalakna leh hmalakna tura rua-hmanna chhawpchhuahte a hmunah tlawhin a enpui a. Hnahlan khuaa amah lawmna hun buat-saih ah Chief Minister chuan hmasawnna hnathawh rei tak thuanawp chu hripuiin ziaawm lam a pan chhoh zel beisei chungin an theihtawp an chhuah ang tih a sawi a. Leilung nghenga eizawnna a ni emaw, eizawnna kawng dang dang hmangin sum hnar ngel nghet, intodelhna siam turin SEDP duan a nih thu leh, hemi atanga puihna an hmuh te chu tangkaia mahni intundin tumna nen hman ngei tur a nih thu a sawi bawk. Chief Minister hian Cham-phai-a hmalakna thenkhat te pawh a hmunah a tlawh nghal bawk a ni.

Bawrhsap in ngenna siam

Aizawl District Bawrhsap chuan COVID-19 hri leng mekin kan hmalam hunah enge min thlen dawn hriat a nih loh avangin Mizoram sawr-kar in he hri laka invenna kawnga ruahmanna leh inkaihhruaina tun thla ni 23-a a tihchhuah chu VLTF/LLTF ten mahni bial theuh ah zawm a ni em tih khauh taka lo enfiah thin turin a ngen a. Hei bakah hian Mizoram Kohhran Hruaitute Committee (MKHC) Chairman hnenah pawh lehkha thawnin Kohhran Inkhawm neih chhun-zawm a nih leh tak avangin SOP zawm a nih theih nana hma la turin a ngen bawk.

CADC Chairman paihthlak a ni

Chakma Autonomous District Council Budget Session nimin-a neih ah Chairman nilai rintawk-lohna Motion pulutin Chairman nilai, Amaresh Chakma chu paihthlak a ni. Nimin a CADC thut-khawm hi Deputy Chairman, Mahesh Chakma chuan kaihruaiin, Chairman rintawklohna Motion hi Parva bialtu MDC, Mohan Chakma chuan a pulut a, Member 20 awmna ah MNF Member 9 leh BJP Member 7 ten Motion thlawp zawngin ban an phar a Chairman nilai, Amaresh Chakma chu paihthlak a ni a, March ni 30-ah Session hi chhunzawm a ni ang. Tun dinhmun ah CADC Seat 20 awmna ah MNF in Member 13 neiin, BJP in member 7 an nei mek a, Amaresh Chakma hi Kamalanagar South MDC Constituency atanga MNF ticket-a thlantlin a ni.