Ni 2 chhungin hri kai thar 4 leh dam 7 awm

Zirtawpni-a Mizoram-a Sample enfiah atangin COVID-19 hri kai mi 3 hmuh niin Inrinni-a Sample enfiah atangin hri kai mi pakhat hmuh a ni bawk.

Zirtawpni khan Mizoram-ah Sample 976 enfiah niin heng atang hian COVID-19 hri kai mi 3 hmuh an ni a, heng hri kai hmuh te hi Rapid Antigen Test hmanga Sample enfiah 951 te atanga hmuh vek niin Aizawl Mission Vengthlang-ah nupa leh Mamit District-ah State pawn atanga rawn haw mi pakhat an ni a, Mission Vengthlang ami te hi hri an kaina hriat a ni lo. Zirtawpni khan ZMC Laboratory-ah Sample 11 enfiah niin TrueNat Laboratory-ah Sample 14 enfiah a ni bawk.

Inrinni khan Mizoram-ah Sample 664 enfiah leh niin heng atang hian hri kai pakhat hmuhchhuah leh a ni a, District hrang hranga TrueNat Laboratory-ah Sample 31 enfiah niin heng atang hian Champhai District-ah hri kai pakhat hmuh niin hmeichhia kum 74 mi, tualchhung-a hri inkaichhawng a ni. Inrinni-a ZMC Laboratory-a Sample enfiah 28 leh Rapid Antigen Test hmanga Sample 605 enfiah atangin hri kai hmuh erawh an awmlo thung.

Inrinni khan Mizoram-a COVID-19 hri kai enkawl mi 2 te chu hri lakah fihlimin anmahni enkawlna hmun atanga chhuahtir an ni a, nimin khan mi 5 te chhuahtir leh ni bawkin heti hian nimin tlai dar 5:00 thleng khan Mizoram-a COVID-19 hri kai hmuhchhuah chu 4423 an ni ta a, an zinga 4393 te chu enkawl dam ni tawhin tunah hian hri kai enkawllai 20 an la awm a, Mizoram-a hri kai hmuhchhuah atanga za zela 99.32 te chu enkawl dam niin hri kai zingah nunna chan 10 an awm tawh bawk a ni.