Latest News

Zan lam Pathian biak inkhawm phalin Inkhawmna ah zai theih a ni tawh dawn

Hri leng avanga mipuite khuahkhirhna siam thlahdul mekah Kohhran te tana zan lama inkhawm phal a ni tawh dawn a, chawlhkar khat-ah zan hnih zel Pathian biak inkhawm neih hi neih theih a ni anga, Pathian fak-a zaiho pawh phal a ni tawh dawn a ni.

Nimin khan Health Minister, Dr. R. Lalthangliana hovin SAD Conference Hall, Aizawl-ah Mizoram-a COVID-19 hri leng dinhmun thlirhona neih a ni a, he thutkhawm a tel te hian Mizoram COVID-19 dinhmun uluk taka an sawiho hnuah boruakin ziaawm lam a pan zel nia a lan avangin kar khatah zan hnih (2) Pathian Biak inkhawm neih tawh nise an ti a, Biak In-a Pathian faka zaiho pawh phal tawh nise an ti. Hemi atan hian State Executive Committee on State Disaster Management in Standard Operating Procedure siamin Order an tichhuak ang. Hei bakah hian March ni 10-11, 2021-a Mizoram Presbyterian Church Synod in Kohhran Hmeichhe Khawmpui Lian Khatla Kohhran Biak In-a an neih turah khawmpui palaite Biak In compound-a an riahluh vek dawn avangin zan lam programme neih an phalsak bawk.

He Meeting hian Zoram Medical College (ZMC) chu karleh Thawhtanni (March ni 15, 2021) atangin COVID-19 veite bakah COVID-19 vei ni kher lo, damlo dangte tan in admit theih a nih tur thu tarlan a ni a. COVID-19 hri kai te awmna Ward leh damlo dangte awmna Ward hi a hranpa a siam a nih bakah, a panna kawng leh luhka te pawh a hranpa a siam vek a nih avangin engmah hlauhthawn tur a awm loh thu tarlan a ni a. COVID-19 dona kawnga hmanrua leh bungrua mamawhte pawh tun dinhmunah chuan indaihlohna a awm rih loh thu tarlan a ni bawk.

He thutkhawma tel te hian COVID-19 volunteers te tlawmngaihna leh thahnemngaihna lawmawm an tih thu sawiin, an lawmman tur pek theih a ni tawh lo chung pawha Mizoram tan a ni hriaa hlawh phut miah lova a tul ang anga theih-tawp chhuaha la thawk chhunzawmte inpekna a ropui an tih thu leh chhuanawm an tih thu an sawi a. Chhiatni thatni atana hman SOP pawh ennawn tura ruahman a ni bawk.

Comments

Chhiar Hlawhte