Internet thatlohna hmunah Ration buhfai Offline hmanga sem dan ruahman dawn

Supply Minister, K. Lalrinliana'n Internet thatlohna hmunah Ration buhfai Internet kaltlang kher lova, Offline hmanga sem turin ruahmanna siam a ni ang tih House a hrilh a. Mizoram chu Central sawrkar duh dan angin One Nation One Ration Card tihhlawhtling hmasa State a nih thu a sawi bawk.

Nimin-a Mizoram Legislative Assembly thutkhawm ah Palak bialtu MLA, KT. Rokhaw leh Dampa bialtu MLA, Lalrintluanga Sailo-in an bial chhungah Internet thatlohna hmun tam tak a awm avanga Ration buhfai sem theih a nih loh chungchangah Internet kaltlang kher lova Ration Buhfai sem dan ngaihtuahpui tura an ngen angin Supply Minister hian, National Food Security Act hnuaiah Ration semna atan electronic Point of Sales (ePOS) hman tur tih a ni a, hei hi tih theih vek erawh a ni kher lova, Internet Singal a awmlohna na na chuan Internet kaltlang kher lova Offline hmanga sem a nih loh chuan tih ngaihna a awm lova, chumi atan chuan thupek awmsa a awm bawk avangin mipuiten Ration lak kawnga harsatna an tawh loh nan lo enzui a nih tur thu a sawi a ni.

Supply Minister chuan Mizoram chu Central sawrkar duh dan angin One Nation One Ration Card tihhlawhtling hmasa State a ni tih sawiin, tunah hian FPS 1,244 atangin Ration buhfai semchhuah mek niin ePOS Machine vuah vek tawh anih thu a sawi a. Mizoram District 7 chhunga khaw 21-a Warehouse leh a kaihhnawih Officer leh Staff Quarters, Toiler, Approach road sakna turin NABARD loan vbc. 37.47 puk niin, hemi khin nan hian State Matching Share vbc. 2.14 Mizoram sawrkar atangin an dawng tih a sawi bawk.

Supply Minister sawi danin COVID-19 hrileng avangin ei leh bar a mi harsa zawkte an buai loh nan Central sawrkarin kum 2020 April thla atanga November thla inkar zawng AAY leh PHH chhungkua-te hnenah mi pakhatah buhfai Kg. 5 hisapin thlatin a thlawnin a rawn pe a. He buhfai hi FCS&CA Department chuan sem tluanin quintal 2,76,402.95 a tling a ni. COVID-19 hrileng avanga mipui an tam loh nan Central sawrkar chuan AAY leh PHH chhungkua-te tan Dal, chhungkaw khatah Kg. 1 zelin thla thum chhung atan Metric Ton 466,215 Mizoram a pe a, hemi hnu hian Chana Metric Ton 777.025 dawn a ni leh bawk.