Latest News

Agriculture Minister in Buyer Seller Meet hawng

Ni hnih awh tur ‘Export Promotion Conference-cum-Buyer Seller Meet’ chu nimin khan Aijal Club-ah neih tan niin Agriculture Minister, C. Lalrinsanga chuan a hawng a ni.

Agricultural and Processed Food Products Export Development Authority (APEDA) leh Mizoram sawrkar-a Commerce & Industries Deparment tangkawp buatsaih Conference hawnna ah hian Agriculture Minister chuan COVID-19 hripui leng avangin Agriculture leh a kaihhnawih te bakah Micro, Small and Medium Enterprises (MSMEs) ten nasa takin harsatna an tawk a, hetih rual hian thil lawmawm deuh lo lang chu kan thalaite zingah Primary Sector leh Entrepreneurship lama harhtharna a lo thleng ni-a lang hi a ni, a ti a. Mizoram sawrkar pawhin hei hi a tuipuiin hetiang lama tuite chu theihtawpa dawm a tum thu a sawi bawk.

Minister chuan COVID-19 hripuiin min kiansan a, a tak taka hna thawh thuai thuai theih hun a nghahhlehawm tawh hle tih sawiin, loneitute thawhchhuah a leta tihpun tumin Agriculture Department chuan theihtawp a chhuah thu a sawi a. District hrang hrangah KVK kaltlangin OP-12 Bio-Gertilizer Unit, Bio-Control Laboratory leh Seed Bank kan buatsaih mek a, Organic Farming pawh chak taka kalpuiin tunah hian MOVCD-NER Scheme hnuaiah ram hectare 14,000 a zau ah hma kan la mek a, kum 2021 kumtawp-a Hectare 7000 dang tih belh hman turin theihtawp kan chhuah a ni, a ti a. Loneitute chu an tharchhuahte hlawk lehzuala an thar theih nan leh, a hralhchhuah lam thlenga hlawk zawka an kal theih nan theihtawp chhuahin sawrkarin hma a la ti a sawi bawk.

He hunah hian APEDA-a Advisor (NAB), Dr. BS Negi chuan Agricultural and Processed Food Products Export Development Authority (APEDA) chu Agricultural and Processed Food Products Export Development Authority Act, 1985 tlawhchhanin April ni 30, 1986 khan din a ni tih sawiin, loneitute leh kuthnathawktute hmasawnna chu a ngaihtuah ber a nih angin Export Promotion Conference-cum-Buyer Seller Meet chu India ram hmun hrang hrangah an buatsaih thin thu a sawi a. Buyer Seller Meet in a tum ber chu Mizo kuthnathawktu te thei leh thlai tharte India ram state dangah te leh ram pawn thlenga thawnchhuah theih dan ngaihtuah tlan a nih thu a sawi bawk.

Nimin-a tan tak Export Promotion Conference-cum-Buyer Seller Meet-ah hian Mizoram chhung hmun hrang hrang atanga kuthnathawktute leh entrepreneur te an kalkhawm a, Vawiin ah chhunzawma zawhfel a ni ang.

Comments

Chhiar Hlawhte