DC hovin Anti-Tobacco Squad thutkhawm neih a ni

Serchhip District Anti-Tobacco Squad te chu nimin khan an Chairman leh District Bawrhsap, Kumar Abhishek hova thukhawmin an hmalakna leh hmachhawp te an thlirho.

He thutkhawm Serchhip DC Meeting Hall-a neih hi Bawrhsap, Kumar Abhishek chuan kaihruaiin kum 2019-2020 leh 2020-2021 chhunga an hmalak tawh dan hrang hrangte chu National Tobacco Control Programme (NTCP) Serchhip District Consultant, K. Hmingthansangi chuan a tarlang a, hmalak zui zel dan tur sawiho a ni bawk.

He huna tarlan a nih danin kum 2020-2021 chhung khan Squad Drive tum 34 neih niin Dan bawhchhia mi 83 man an ni bawk a, an pawisa chawi tlingkhawm chu Rs. 4,140/- a ni bawk a, Legal Metrology leh Food and Drug Administration te nen tum 2 Joint Drive an nei bawk. Kum kalta chhung khan Serchhip District-a Tobacco Cessation Clinic chu mi 201 ten panin mi 36 te chuan Vaihlo leh a kaihhnawih an tih thin te an sim thu he hunah hian tarlan a ni bawk.