Old Age Pension sem chungchang sawifiah

Social Welfare & Tribal Affairs Department chuan tunhnaia Old Age Pension (Tar chawmna) a kimlo a sem nia sawi chungchang chu a sawifiah.

Hemi chungchanga nimin-a sawrkar thuchhuah chuan Old Age Pension hi Ministry of Rural Development chuan National Social Assistance Programme (NSAP) hnuaiah kum 60 - 79 leh kum 80 chin chunglam te tan Indira Gandhi National Old Age Pension Scheme (IGNOAPS) kaltlangin a pe tih tarlangin, kum 60-79 te hi thla khat ah Central Share Rs. 200/- leh State Share Rs. 100/- zel pe in kum 80 chunglam te hi thla khat ah Central Share Rs. 500/- leh State Share Rs. 100/- zel pek an ni tih an tarlang a.

Tun dinhmunah Central Share hi Serchhip District bikah July, 2020 thleng sem tawh a nih thu leh State Share hi September, 2020 thleng sem a ni tawh tih pawh tarlangin, Central Share hi August 2020 atanga October, 2020 thleng sem theih maia peihfel tep niin December, 2020 thleng pek theih nan sanction tura buatsaih mek a ni bawk tih an tarlang a. Hemi bakah hian Pradhan Mantri Garib Kalyan Yojana (PMGKY) hnuaiah COVID-19 hrileng avanga chhawmdawlna atan Central sawrkarin Old Age Pension dawngtute hnenah Rs. 1000/- theuh a pek pawh sem tawh tih an tarlang.

Sawrkar thuchhuah chuan Old Age Pension Scheme hnuaia pension dawngtu tur ten an dawn tura Ministry leh State Sawrkarin a tih zat hi vawikhatmah lak thensak ni lovin a kim thlapa pek zel a tih tarlangin, tumkhatah thla 6 atan te, thla 4 atan te sem chhuah a ni thin tih an tarlang bawk.