Latest News

Myanmar-a harsatna tawk te enliam mai lo turin MZP President in Zoram mipuite a chah

Mizo Zirlai Pawl (MZP) General Hqrs. President, B.Vanlaltana chuan Myanmar ramchhung buai avanga harsatna tawk mekte chu Zoram mipui ten an enliam mai tur a ni lo tih sawiin, mahni unau te hmangaihna lanchhuahtir hun chu harsatna an tawh hun hi a ni, a ti.

Zirtawpni kalta zan-a Aizawl Ignite Studio-a ‘Zoram Ni’ hmanna-ah he thu hi sawiin MZP President chuan, Zofate chu Myanmar-ah te, Bangladesh-ah te, India-ah leh khawvel hmun hrang hranga kan awmdarh tih sawiin, Mizoram in zalenna a sual lai pawhin Mizo hnam pasaltha te pawh Myanmar leh Bangladesh-ah te kalin anni in an lo tuamhlawm thin tih a sawi a. Chuvangin Myanmar-a Zofate Mizoram-a inhumhim duh a lokal an awm a nih pawhin an tawng a lo dang deuh emaw, an khawsak phung lo dang deuh a nih pawhin Mizo mipuite'n hmangaih taka lo dawng-sawnga lo enkawl tur a ni, a ti a. Harsatna tawkte tan sawrkar thuneitute berawn chungin MZP chuan a tul angin hma a la zel dawn tih a sawi bawk.

MZP President chuan 'Zoram Ni' hman a nih chhan pawh sawiin, kum 1966-ah India sawrkar chuan ramdangah pawh la thleng ngai lo Jet Fighter hmangin Mizoram a bei a, he thil thleng avang hian nunna chan hial te leh ram-tuileilo-a awm mi thahnemtak an awm phah a ni, a ti a. “Kan hliam hluite dam se la,  March ni 5, 1966-a thil thleng hi inlungrualna nei tura hma kan lak thar leh a ni, thangtharte tan Nationalism chungchang hre tura kan inzirtir thar lehna ni atan leh ramdang hmasawn ruala ke kan pen ve zel theih na tur atan urhsun taka hmang thin kan ni,” tiin he tawrhna ni hi Hnam tana inpek thar nan leh hmasawn phah nan thangtharten tangkai taka an hman chu an duhdan a nih thu a sawi bawk.

'Zoram Ni' puala MZP te hun hman hi an pawl Vice President, Peter Chhangte chuan a kaihruai a, Zoram Ni chungchang-a L. Ramdinliana Renthlei paper buatsaih chu an zirho nghal bawk a ni.

Comments

Chhiar Hlawhte