Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Serchhip bial-a Assembly bye-election neih tur atan inbuatsaihna kalpui zui zel a ni

Serchhip Bial-a Assembly bye-election neih hun tur puan a nih hnuah he inthlanna neih tur atan hian inbuatsaihna ngawrh taka kalpui nghal niin he inthlanna atan hian mawhphurhna hrang hrang pawh siam a ni tawh.

Serchhip Bial-a Assembly bye-election neih turah hian District Election Officer, Kumar Abhishek chu Returning Officer a ni dawn a, he inthlanna neih turah Model Code of Conduct tha taka zawm a nih theihna tur atan Monitoring Team hrang hrang din niin MCC Team te hi Serchhip DRDA Project Director, Malsawmtluanga, SDO (Sadar) C. Laltleipuii leh Serchhip SDPO Kaste Romalsawma te chuan an vil dawn a ni.

Tun tuma inthlanna neih tur atan hian Sector Officer atan mi 4 ruat ni tawhin heng te hi an Bial tur theuh siam sak an ni tawh a, Assistant Expenditure Observer atan mi pahnih ruatin Static Surveillance Team (SST) pahnih din a ni bawk a, Flying Squad Team (FST) pathum siamin Video Surveillance Team (VST) pawh pahnih siam a ni a, hei bakah hian Video Viewing Team (VVT) pawh pakhat din a ni a, heng Team hrang hrangah hian mawhphurtu tur pawh ruat fel an ni tawh bawk a ni.

Hetianga Serchhip Bial bye-election neih hun tur puan a nih tak avang hian nimin khan Serchhip District Bawrhsap hovin DC Office a Officer te chuan thutkhawm nei nghalin inthlan neih tur atana inruahmanna hrang hrang an thlirho nghal a, nimin vek khan MCC Monitoring Team hrang hrangte pawh thukhawm nghalin hma an la tan nghal bawk a, MCC Monitoring Team te awmna tur hmun te pawh ruahman nghal a ni bawk.

Tarlan tawh angin MNF MLA 12 ten India Constitution 10th Schedule Para 2(2) bawhchhia-a an puh Serchhip bialtu MLA, Lalduhoma chu nikum November 27 khan Mizoram Legislative Assembly Speaker, Lalrinliana Sailo chuan Mizoram Legislative Assembly Member a nihna hlih sak (disqualify) a, hemi hnu hian Serchhip bial hi bial ruak-ah puan nghal niin thla 6 chhungin bye-election hi neih tur a ni a. Hemi ang hian Election Commission of India chuan niminpiah khan Serchhip bial-a Assembly bye-election neih hun tur hi puangin he inthlanna neih tur atana hriattirna hi tun thla ni 23 khian tihchhuah a ni dawn a, inthlanna chuh tumte tan tun thla ni 30 thleng hming pekluh theih a ni anga, a tuk March 31-ah inthlanna chuh tura hming pekluh te chu enfiahin April 3 thleng inhnukdawk duh tan hun hawn a ni anga, April 17, 2021 (Inrinni)-ah mipui ten Vote an thlak dawn a ni. He inthlanna a Vote tla te hi May 2 khian chhiar a ni ang.

Comments

Chhiar Hlawhte