Latest News

RD Minister in NLCPR sum hmanga siam East Lungdar-a Mini Sports Complex a hawng

Non-Lapsable Central Pool of Resources (NLCPR) sum cheng nuai 434.96 senga siam, ‘East Lungdar Mini Sports Complex’ chu Rural Development Minister, Lalruatkima chuan Inrinni khan a hawng.

East Lungdar tlang-a ‘East Lungdar Mini Sports Complex’ hawnna hunah hian RD Minister chuan he Sports Complex hawn theiha peih a ni ta chu lawmawm a tih thu sawiin, a puitlin theihna tura hma lo la tawhtu RD Minister hlui leh sawrkar Official te chungah lawmthu a sawi a. Infiamna lamah thalai ten hma kan sawnin eizawnna atana tangkai a nih avangin Sports Policy te kan lo neih tak thu a sawi a, infiamna hmanrua leh hmunhma te pawh nasa taka siam chhoh zel niin Mizo thalaite pawh infiamna lamah an fehchhuak nasa tawh hle a. E. Lungdar pawhin Zofate zinga Olympian hmasa Lalremsanga a lo hring tawh a, amah ang bawka Zofate leh India ram tihmingthatu tur infiammi hrin zel i tum ang u, tiin khawtlang mipuite a fuih a. “Infiamna hmangin ruihhlo leh nun kawng thalo tinreng kan tudawl ang a, hriselna leh ram tihmingthatu ni khawp hiala hmasawn kan tum zel dawn a ni,” a ti bawk. He Complex thara Volleyball Court tha tak siamna tur sum cheng nuai 15 chu tunah hian sanction tawh a nih thu leh Futsal Ground, zanah pawha hman theih tur pawh dah belh tum a nih thu a sawi bawk.

Serchhip DRDA Project Director, Malsawmtluanga kaihhruai he hunah hian RD Department-a AE, David Lalchhuanawma chuan Technical Report pe in he hna hi kum 2017-a thawh tan niin Lushai Engineering ten hna hi an thawk a, July 2019 khan hna hi thawh zawh a ni tawh a ni. Helai hmunah hian Football Ground chu a dung meter 105 leh a vang meter 65 dah niin level hi a thara lak vek a ni a, lei hnuai-ah tuichhe paihna tur meter 2.5 danah dah vek a nih bakah a dung tawn tawnah Side Drain siam a ni bawk. A sirah hian Toilet pahnih, Bedroom pahnih, Kitchen Hall pakhat leh Dressing Room pakhat awmna Pavillion tha tak leh mipuite thutna tur Gallery sak a ni bawk. Playground hi hung vek niin, a sirah Multipurpose Hall tha tak leh Tennis Court siam a ni bawk a, Futsal Ground leh Volleyball Court siamna tur ruahman fel ni bawkin a chhehvel lungrem tul lai leh a panna kawngte pawh siam tel a ni bawk.

He hunah hian East Lungdar BDO, H. Lalhruaitluanga chuan inlawmna thu sawiin MzSRLM-a Chief Executive Officer, Lalchhandami chuan Lungchhuan Village Organisation ten an siam, Mizo Chilli (Mizo hmarcha sawngbawl) chu a tlangzarh bawk a. Minister hian Mini Sports Complex hawnna puala East Lungdar GSA leh Leng GSA ten Exhibition Match an khelh leh Mini Sports Complex hawnna pual-a Mutipurpose Hall-ah Boxing Competition buatsaih Final match te thlirin lawmman a sem nghal bawk a ni.

Comments

Chhiar Hlawhte