NPCDCS hnuaia Population Based Screening zirhona nei

National Programme for Prevention and Control of Cancer, Diabetes, Cardiovascular Diseases and Stroke (NPCDCS) hnuaia Population Based Screening kalpui tur  chungchang zirhona chu nimin khan Serchhip Press Club-ah neih a ni.

He zirhona hi Serchhip CMO, Dr. Laldawngliana chuan hmanpuiin tunhma lam kha chuan India ramah inkaichhawn theih natna te kan buaipui tawk viau tih sawiin, tunah chuan inkaichhawn theihloh natna hrang hrang laka kan him theihna tura hmalak chu kan buaipui thu leh chumi atan chuan Population Based Screening chu thil pawimawh a nih thu a sawi a. Hemi atan hian he huna tel Serchhip District chhunga Health & Wellness Officer (HWO), Health Worker leh ASHA te chu thawktu pawimawh an nih thu leh heng natna ten mihring min khawih pawi tak tak hma leh hmanraw awlsam zawka natna hriat-chhuah theih a nih laia lo enkawl chu a pawimawh thu a sawi a. Sub-Centre hrang hrangte chu Health & Wellness Centre-a hlankai vek tum a nih thu a sawi bawk.

Nimin-a Training hi NPCDCS-a DPC, K. Zothanpuii chuan kaihruaiin Non-Communicable Diseases (NCD) chungchangah Dr. Lalhlunpuii, Nodal Officer chuan zirtirna pein NPCDCS chuan inkaichhawn theihloh natna (Non-Comunicable Diseases)- BP Sang, Zun-thlum, Ka chhung na, Hnute leh Chhul Cancer, Lungna leh Stroke lakah invenna lam a kawk bik tih sawiin, heng natna inkaichhawn theihloh te laka khawtlang an himna turin heng natna vei awlsam bik nia ngaih, kum 30 tling chin chunglam te chu In tinah kal-a an hriselna endiksak vek chu Population Based Screening in a tum anih thu a sawi bawk.

Ani bakah hian Juby Zosangliani, Staff Nurse NPCDCS; NPCDCS-a DPC, K. Zothan-puii leh PC. Lalengkima, Physiotherapist NPCDCS ten kalkhawmte hi zirtirna an pe a ni.