Latest News

ZPM OB hlui inti ten Lalduhoma chu Dan a bawhchhiat vanga ban a nih thu an sawi

ZPM Party-a OB lo ni tawh thin nia insawi mi thenkhat te chuan Serchhip bialtu MLA atana thlantlin, Lalduhoma chu India Danpui a bawhchhiat avanga MLA atanga ban an nih thu an sawi a. Lalduhoma’n rinawmna thu a tiamna nia a sawi ZPM Tangrual Pawl chu phumbo leh vuiliam a nih tawh thu an sawi bawk.

Nimin-a Serchhip Press Club-a thuthar thehdarhtute an kawmna ah ‘Ex-OB ZPM General Hqrs.’ inti, VL. Thazova leh a thian te chuan MLA atanga Lalduhoma ban a nih chhan chu Independent MLA te tana ramri kham pel lo tura India Danpui in a siam, 10th Scheduled Para 2 Sub No. 2 a dai pelh vang a ni tih an sawi a. Hetianga Independent Ticket-a MLA a thlantlin ten Political Party an zawm theihlohna Dan siam a nih te, Independent MLA ten Political Party te angchhungah neitu chan changa hmalakna neih chiam phallohna dan siam a nih te hre reng chunga Lalduhawma'n ZPM Party-ah neitu chan changa a hmalakna zawng zawngte chu Serchhip bial mipuite tan hai rual a nih loh thu an sawi a. Chutih laia Lalduhawma'n Dan bawhchhe lo leh Assembly House-a amah huphurh vanga ban anga a sawi te, ZPM a rinawmna thutiam a neih pawh Vawiin thlenga la vawngnung anga a insawi te chu dawt leh thu belhchian dawl lo, mipuite rilru hruaikawi tumna ah an ngaih thu an sawi a. Lalduhawma'n ZPM-ah rinawm takin ka la awm reng a tihna ZPM Tangrual Pawl chu July ni 3, 2019-ah phum bo, vuiliam daih tawh a nih thu sawiin, amah ngei pawh vuiliamtu phusa berte zinga mi a ni nghe nghe tih an sawi bawk.

Heng Ex-OB ZPM General Hqrs. inti te hian zawhna chhangin Party awmna nei an ni tih sawiin, amaherawh chu tun tumah hian eng Party emaw tana hamthatna tur ngaihtuaha rawn kal an ni lo tih an sawi a. VL Thazova chuan Party thar din an tumlo tih sawiin, tu party tan maha campaign an nihloh thu leh Lalduhoma thil tih dikloh Serchhip mipuite hmaa an puanchhuah duh avang chauha ti an nih thu a sawi bawk.

Nimin-a thuthar thehdarhtute kawmtute hi VL. Thazova bakah JV. Pahlira, Lalramthara, DK. Thanga leh Biakkima te an nih thu an sawi a, nimin vek khan Thenzawl an pan leh nghal a ni.

Comments

Chhiar Hlawhte