Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

District 2-ah chiah hri kai enkawllai awm tawh

Niminpiah khan Mizoram-ah Sample 660 enfiah niin heng atang hian COVID-19 hri kai mi 2 hmuhchhuah leh an ni a, Mizoram District 11 zingah hri kai enkawllai awmna District pahnih chiah a awm tawh a ni.

Niminpiah-a hri kai hmuhchhuah pahnih te hi Rapid Antigen Test hmanga Sample enfiah 632 te atanga hri kai hmuhchhuah niin pakhat hi Champhai Vengthlang mi niin Aizawl-a in check-up tura kal, hri a kai tih hmuhchhuah niin hri a kaina chhui zui nghal a ni a, pakhat dang hi Champhai District mi bawk niin Manipur atanga rawn haw, Saitual District-a hri kai tih hmuhchhuah a ni bawk. Niminpiah khan ZMC Laboratory-ah Sample 26 enfiah niin District hrang hranga TrueNat Laboratory-ah Sample 2 enfiah a ni bawk a, hri kai hmuhchhuah erawh an awmlo thung.

Nimin khan Mizoram-a hri kai enkawl dam an awm belh lova, heti hian nimin tlai dar 5:00 thlenga Mizoram-a hri kai hmuhchhuah chu 4434 niin heng zinga 4415 te chu enkawl dam an ni tawh a, hri kai hmuhchhuah atanga za zela 99.57 te chu enkawl dam ni tawhin hri kai enkawllai 9 an la awm a, hri kai zingah nunna chan mi 10 an awm tawh bawk a ni.

Tun dinhmunah Mizoram-a District 11 zingah Aizawl leh Saitual District-ah chiah hri kai enkawllai an awm tawh a, Aizawl District-ah hian hri kai enkawllai mi 7 la awmin Saitual District-ah mi 2 enkawl mek an la ni a, a bak District dangah hri kai enkawllai an awm tawhlo a ni.

Comments

Chhiar Hlawhte