Latest News

Serchhip-ah Boxing CoE din tum a ni

Sports Minister, Robert Romawia Royte chuan Serchhip-ah Khelo India Boxing District Center of Excellence din a ni dawn tih a sawi.

Sports Minister, Robert Romawia Royte hian nimin tlai khan Serchhip Boxing Hall tlawhin helai hmuna Boxing zirlai mi 84 te leh anmahni enkawltu Serchhip District Boxing Association hruaitute hmaah Serchhip-ah Khelo India Boxing District Center of Excellence din a nih tur thu leh hemi atana thil tul zawng zawng pawh Union Sports Minister nen an tihfel tawh thu sawiin, reilote ah hawn tura buatsaih zui nghal a nih tur thu te a sawi a, “Reilote ah Khelo India Boxing District Center of Excellence dinna atana thil tul tur te zirchiangin Central atangin mithiam an lokal thuai dawn a, he Boxing Center of Excellence a lut te chu Central sawrkar in an mamawh zawng zawng a ngaihtuahsak bakah thla tin Stipend a pe thin dawn a ni,” a ti bawk.

Sports Minister Robert Romawia Royte chuan Boxing zirlai te hmaah Boxing chu Mizote khelh chi tak a nih thu te, Olympic thlenga Gold Medal la thei tura Mizo naupang te inbuatsaih a tul thu sawiin, “Boxing zirlai nih vangin School zirlai thlahthlam tur a ni lo,” a ti a. “Boxer te chu zuk leh hmuam, ruihtheih thil laka fimhlim mi an ni tur a ni,” a ti.

Sports Minister chuan Boxing hmasawnna atana Serchhip District Boxing Association (SEDBA) in kawng hrang hranga hma a lakna chu fakawm a tih thu sawiin, “Nakin lawka World Champion chher chhuak thei turin Serchhip District hian Boxer leh Boxing hruaitu in nei tha a, Sawrkar pawhin a tihtur a ti zel ang,” a ti bawk.

Comments

Popular News (Last 30 Days)