Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Special Vendors Development Programe hman a ni

Mizoram Handloom & Handicrafts Development Corporation Limited (ZOHANDCO) buatsaihin nimin khan Serchhip Auditorium-ah ‘Special Vendors Development Programe’ hman a ni.

‘Special Vendors Development Programe’ hi ZOHANDCO-a Asst. Manager, Ngursang-liani Sailo chuan kaihruaiin kalkhawmte lawmna thu a sawi a, he huna khuallian Serchhip DRDA Project Director, Malsawmtluanga chuan Mizote chuan thiamthil kan ngah hle tih sawiin, thiamna kan ngah avangin thil ngai reng kan tirei peihlo nia a hriat thu a sawi a, kalkhawmte hnenah hlawhtling tur chuan teirei peih a ngai tih a sawi bawk. 

Khuallian chuan Mizoram-ah chuan mipui kan la tam tawkloh avangin eizawnna kawngah hlawk tham tak tak a thil tih a harsa tih pawh sawiin, kan thiamna atanga thil siamchhuah a man a to in, a leitu tur kan la tlem si a, hlawk tak tak a thiltih a harsat thu a sawi a. Duhamna chu thil pawi tak a nih thu pawh sawiin, vawilehkhata hlawk thur thur tum lovin, hlawhtling tur chuan a tahtawla kal bek bek a, kan beih tauh tauh a ngaih thu a sawi bawk.

He hunah hian ZOHANDCO Chairman, C. Lalrammawia pawhin Vendors Development Programme-ah chuan eizawnna kawng hrang hranga lo inhmakhua tawhte leh lo indap-chhuak tawhte bakah la indapchhuak lehzel turte leh a leitu turte an inthlunzawmna lai tak chu a pawimawh thu a sawi a, SHG a eizawnna atana an lo thawh tawh te, sumdawng lian emaw Sawrkar Department hrang hrangte-ah an mamawhte in hrilhtawnna tur atan a indawhzawmna, a leitute leh a hralhtute inkara indawhzawmna programe pawimawh tak anih thu sawiin, SHG kalkhawm te chu hlawk tak a hmang turin a chah bawk.

He hunah hian Serchhip-a sawrkar Department hrang hrang atangin DRDA, ATMA, Sericulture leh District Industries Centre aiawhte telin zirtirna an pe a ni.

Comments

Chhiar Hlawhte