Latest News

Chanchin thar thenkhat :

Private Resolution pawm

Mizoram Legislative Assembly thutkhawm nimin-a chhunzawm-ah Lawngtlai East bialtu MLA, H. Biakzauva resolution putluh chu sawiho a nih hnuah lungrual taka pawm a ni. Nimin-a Assembly thutkhawm ah hian zawhna leh chhanna hun hman a nih hnuah Zirtawpni a tih thin angin Private Member Resolution sawihona neih a ni a, Member 19 te Resolution thehluh zingah Lawng-tlai East bialtu MLA, H. Biakzauva Resolution putluh, ‘COVID-19 hripui leng do kawnga sawr-kar, Kohhran, tlawmngai pawl leh Zoram mipuite tanrualna avanga India ram-a a titha ber State zinga Mizoram kan tel hi a lawmawm kan ti a, he hripui do kawngah nasa lehzuala tanho chhun-zawm zel tha kan ti,’ tih chu member te’n an sawiho hnuah lungrual taka pass a ni.


Mara Kut Lyuva Khutla hmang

Mara Kut zinga lawm hlawh ber leh ropui ber ‘Lyuva Khutla’ chu nimin khan Siaha-a MADC Complex-ah hman a ni a, kumin-a Lyuva Khutla ah hian COVID-19 hripui avangin Sawrkar dan siamte zawm chungin mi pawimawh sawm bikte leh chanvo hrang hrang neih te chauh an tel a, Minister hlui S. Hiato chu Kutpa, Azipa atan hman niin, Lyuva Khutla kan lawm hian Mara hnam hi hnam taima leh intodelh kan ni thin tih min hriattir nawn tir se, La dehthiam tak leh Hnam bil incheina silh leh fen nei tha tak kan nihna leh kan hnam ziarang leh lam chi hrang hrang te pholangin chawinung zel rawh se, a ti a ni. He hunah hian Mara Hnam lam leh zai chi hrang hrang bakah item chi hrang hrang hmuhnawm tak tak entir a ni bawk.


A&C Minister in hmanpui

India in zalenna a hmuh vawi 75-na ropui taka lawmna (Azadi Ka Amrut Mahotsav : 75-week) denchhenin nimin khan Aizawl Chanmari atanga Vanapa Hall leh Sikulpuikawn atanga Vanapa Hall thlengin Rally buatsaih a ni a, he hun hi Art & Culture Minister, R. Lalzirliana chuan hmanpuiin Vanapa Hall Tual-a inkhawm tawi neih ah he Ni hman chhan te a sawi bawk.


Bank te hmalak dan thlirlet

Nimin khan Mamit-ah District Bawrhsap, Dr. Lalrozama hovin nikum December thla tawp Quarter thlenga an District chhunga Bank te hmalak dan thlirletna neih a ni a. He hunah hian Financial Year 2020-21 chhungin PMEGP hnuaiah target 83 ah mi 39 te Loan pek an nih thu leh SHGs hnuaiah hian Group 189 te hnenah loan cheng nuai 189 pek tawh a nih thu tarlan a ni.


Sawrkar in Board din tum

School Education Minister, Lalchhandama Ralte chuan nimin-a Assembly thutkhawm ah Mizo tawng tihmasawna, venghim a, a than zel theih nan Language Development Board din turin ruahmanna siam a nih thu a sawi a, Assembly Session Thlasik thutkhawm neih huna Bill pulut thei turin Draft Bill peih a ni tawh tih a sawi bawk.

Comments

Popular News (Last 30 Days)