Latest News

Parliament Session kal mekah nimin khan Mizoram Rajya Sabha MP, K.Vanlalvena chuan Zero Hour-ah thu sawiin, Myanmar atanga lo tlanchhia te lo dang kir tura India sawrkar-in a ti chu Mizo mipui te chuan an hrethiam dawn lo tih sawiin, Ministry of Home Affairs chu Myanmar atanga raltlan te himna turin a tul anga an kalphung her danglam turin a ngen bawk.

Nimin-a Parliament thutkhawm ah Mizoram Rajya Sabha MP hian Zero Hour-ah thu sawiin Myanmar ram buaina avanga Mizoram-a raltlan te chungchang a sawichhuak a, he hunah hian K. Vanlalvena chuan Myanmar ramah democracy tungding a, mihring dikna leh chanvo humhim tura beitute chungah rawng taka sipaite chetna avanga Mizoram lama rawn tlanchhia mi 300 chuang an awm thu Parliament House-ah hian sawiin, heng zinga 150 vel zet chu Myanmar Police a thawkte an ni tih a sawi a. Heng mite hi Mizoram sawrkar leh Mizo mipui, pawl hrang hrang ten lo kuangkuahin sawrkar laipui hriatpui lohvin an lo tanpui a ni, a ti.

Hetihlai hian Ministry of Home Affairs chuan Myanmar ramri depa awm hmarchhak State 4 Chief Secretaries te chu Myanmar atanga lo tlanchhia te lo dawngsawng lo tura rawn hriattirin, ramri-a Duty Assam Rifles te chu Myanmar lam atanga ramri kan-a lo tlanchhe turte lo dang kir turin a hriattir a. Hemi chungchangah hian Mizoram Rajya Sabha MP chuan hetianga Myanmar atanga lo tlanchhiate lo dang kir tura India sawrkar-in a ti hi Mizo mipui te chuan an hrethiam dawn lo tih a sawi a. “Myanmar atanga lo tlanchhia te chu Mizote hnampui, Mizo chi leh kuang te an ni a, tihhlum tur atana thawnkir chu mihring nihna atanga ngaihtuah pawhin thil tih chi a ni lo,” a ti.

Myanmar ram buaina a ziaawm a, bo-ruak a ralmuan hma loh chuan in thawnkir chi a ni rihlo tih Mizoram Rajya Sabha MP, K. Van-lalvena chuan sawiin, India ram chu khawvela Democracy ram lian ber a nih angin mipui rorelna democracy tungding tura beihna reng reng chu thlawp leh tanpui hi India ram in a tih awm tak a ni, tiin House ah hian a sawi bawk a. “Khawvel pumin heng Myanmar raltlante hi lo hum tura India mipui te min beisei laiin Ministry of Home Affairs hian Myanmar raltlan te chungchang hi ngun taka ngaihtuahin a kalphung thlak danglam se,” tiiin House-ah hian ngenna a sawi bawk a ni.

Comments

Chhiar Hlawhte