Latest News

Chanchin thar thenkhat :

CM in Lengpui Airport tlawh

Chief Minister, Zoramthanga chuan nimin zing khan Lengpui Airport tlawhin Airport siam-that hna thawh mek hrang hrang a enfiah a, heng zingah hian Isolation Bay siam leh Terminal Building siamthat hna thawh mek pawh a tel a ni. Heng bakah hian Terminal building pawn-a lirthei luh leh chhuahna tur te, bungrua thiarluh leh thiarchhuahna tur leh tuldang la awmte chu hmalak zel dan tur thawktute nen an sawiho bawk. Chief Minister hi Additional Chief Secretary, JC. Ramthanga, Aviation Wing Principal Consultant J. Lalhmingliana, PWD Engineer-in-Chief Lalmuankima Henry leh thawktu dang ten an tawiawm a ni.


MNF VC thar a piang

Tuirial bial chhung North Chaltlang khuaa VC member te chuan MNF Party zawmin nimin khan MNF Adviser, Dr. R. Lalthangliana chuan a lawmlut. MNF Party thuchhuah in a tarlan danin N. Chaltlang-ah hian VC member 5 awmin, a hmain MNF VC 2, Congress 2 leh Independent pakhat an ni a. Congress VC dingin VC member dangte hian MNF zawmin, MNF VC thar a piang ta a ni tih an tarlang a ni. He hunah hian Health Minister ni bawk Dr. R. Lalthangliana chuan COVID vangin sawrkar an kal hlei thei lo tih sawiin, “SEDP pawh kan kalpui dawn tan chauh a, mahse, kan tum angin hripui vangin kan kalpui hlei thei ta lo a, theihtawpa bul tan that kan tum leh nghal a ni,” a ti bawk.


RD Minister in hawng

Rural Development Minister leh Aizawl West-II bialtu MLA, Lalruatkima chuan nimin zing khan Aizawl Kanan Ceng VC hruaitu hmasa ber, Khuangringvunga hriatreng na leh, a hming chawia sak ‘Khuanga Bazar’ chu a hawng a, he hunah hian RD Minister chuan kum 2018-a Ministry thar a lo pian atangin MLA tin ten mahni bial chhung hmasawnna tur ngaihtuaha ke an pen laiin Aizawl West-II bial chhungah hmasawnna tam tak hmuh tur a awm tawh thu a sawi bawk.'


MNF Candidate in kawm

Serchhip bial-a bye-election neih tura MNF Official Candidate, Vanlalzawma chuan nimin khan Thenzawl Bazar Veng-a Vantawng Group YMA Run-ah Thenzawl-a VC hrang hrang leh tlawm-ngai pawl hruaitute bakah thuthar thehdarhtute kawmin bye-election lo awm turah Thenzawl mipui leh Serchhip Bial tan hun tha a inherchhuak dawn tih a sawi a. Bye-election neih turah Sawrkar mi pawimawh Chief Minister leh Minister hrang hrang ten bial chhung an tlawh ngun dawn tih sawiin, chung chu khawtlang hmasawnna tur atan lo chhawr tangkai turin Serchhip Bial mipui te a chah a ni.


Chapchar Kut hman a ni

Chapchar Kut-2021 chu nimin khan Ai-zawl Vanapa Hall-ah hman niin Chief Minister, Zoramthanga chu Kut Pa atan hman a ni a, he hunah hian Chief Minister chuan kumin Chapchar Kut thupui, ‘Zonun Zemawi : Thu-awihna’ chu hri leng karah tun hun-a kan mamawh tak nia a hriat thu a sawi bawk. He hunah hian Art & Culture Minister, R. Lalzirliana chu Kut thlengtu niin he hunah hian Mizo Hnam Lam leh Zai chi hrang hrang entir a ni a, he hun an hman hi TV ah leh Youtube-ah Live-a pek-chhuah a ni bawk.

Comments

Chhiar Hlawhte