BCM Assembly zawhfel a ni

Baptist Church of Mizoram (BCM) rorelna sang ber Assembly chuan sawrkar laipuiin a kalpui mek Act East Policy kaihhnawih zirchianna neih leh All India Service a lut an pun theihna atan hmalak nise tih rawtna te a pawm.

BCM Assembly vawi 125-na hi Lunglei Chanmari Pastor Bial chuan thlengin Ramthar BCM Biak In ah neiin nimin khan zawhfel a ni a, he Assembly-a an thurel zingah hian Act East Policy kaihhnawih zirchianna BCM hian neih ni se tih te, Council of Churches in Mizoram din tura hmalak rawtna te, All India Service leh Central Service a lut an lo pun theihna atan BCM-in hmalak ni se tih leh Ram pum huap awmni kham Tawngtai rual neih rawtna te pawm a ni bawk.

Heng bakah hian AICS-a Bachelor of Christian Studies (BCS) hawn remtih a ni a, Mizoram Gospel Quasquicentenial hriatreng nan Upper Assam Field hawn chungchang rua-hmanna leh hmalakna pawmin, bawhzui zel nise an ti a, Finance Committee kaltlanga Contract Employee 43 te dah ngheh thu pawmpui tura report leh Post thar 16 hawn dilna leh Post ruak 15 hnawhkhah dilna te, Temporary post chelh lai mi 74 Substantive post-a dah thu report te pawm a ni bawk.

Kum 2021-22 BCM budget atan cheng vbc. 114.60 pawm a ni a, Kohhran thawh tur zat hi Rs. 77,38,53,000/- niin Department tin thawh tur zat chu Rs. 37,21,47,000/- a ni bawk.