CRP-EP Training nei mek

Mizoram State Rural Livelihoods Mission (MzSRLM) Serchhip District hnuaia Community Resource Person for Enterprise Poromotion (CRP-EP) te tana Training ni 3 awh chu Serchhip-ah neih mek niin Vawiin-ah zawhfel a ni ang.

Tunkar Nilaini atanga neih ‘Training of Community Resource Person for Enterprise Promotion (CRP-EP) on Entrepreneur Startup & Intellectual Property Right’ hi Serchhip DRDA Conference Hall-ah neih niin he hun hi District Functional Specialist, Lalmuanpuia chuan khuallian niin a hmanpui a, MzSRLM hnuaia thingtlang mite dawmkawnna programme pawimawhte a taka kalpuitu, CRP-EP te chu an mawhphurhna a san thu leh an Mobile Handset dawn te chu a nihna tur ang taka pawimawh leh tangkai taka hmang turin a chah bawk a ni.

He training-a tel CRP-EP mi 14 te hi an hnathawhna atana hman tur Mobile Handset hlan niin he hunah hian Block Enterprise Promotion Committee-a Chairman, Lalhmachhuani leh Secretary, VL. Remruati te bakah MzSRLM Mentor, Maya Suresh te pawhin thu an sawi bawk a ni.

MzSLRM hnuaia Mizoram a thingtlang khua te dawmkanna tura ruahmanna Project pakhat - Start-up Village Entrepreneurship Programme (SVEP)-ah hian Block Project Manager bakah Mentors, Facilitator leh Accountant te awmin, an hnuaiah hian Serchhip District chhung khaw hrang hrang atangin CRP-EP mi 14 an awm mek a. Anni hian District chhung khaw hrang hranga Self Help Group (SHG) te kaltlangin thingtlang mite dawmkanna (Rural Development) hna chu Entrepreneur lam hawiin an thawk thin a ni.