Latest News

Chapchar Kut kan thleng leh ta

Chapchar Kut kan thleng leh ta

Vawiin March 5, 2021 hi sawrkar in a ruahman ang chuan kumin atana ‘Chapchar Kut’ a ni a, amaherawh chu kan hriat angin hri leng avanga mipui punkhawmna liantham neih te ala remchan loh avangin kumin hian sawrkar anga Programme buatsaih erawh Serchhip-ah chuan a awm dawn lova. Hei mai bakah hian nikum lamah Serchhip khua in harsatna dang avanga Chapchar Kut kan lo hman tawhloh bawk avangin Serchhip khua chuan kum 2 chhung Chapchar Kut hi kan hmang dawn ta lo niin a lang.

Mizote hian kan pi leh pu hunlai atang tawhin Kut pawimawh deuh deuh pathum kan nei thin a, heng te hi a hman dan leh a hman hun, a hman chhan thlengin a hrang vek a, amaherawh chu Vawiin thlenga kan la hman uar leh kan a ngaihhlut ber erawh Chapchar Kut hi a ni. He Kut hi a nihna tur ang leh an lo hman thin tawh ang thlap thlapin hman theih ni lo mah se kan sawrkar pawhin ngai pawimawh a kumtin hmang zel tura ruahmanna a siam thin hi a lawmawm a, mipuite pawhin kan ngaihhlut a, hun lo kal zel turah pawh uar deuh deuha kan hman chhunzawm zel pawh a pawimawh hle a ni.

Kan hriat angin Chapchar Kut hi mipui nawlpui ten an hman thin niin hlimna hun a nih mai bakah midangte laka induhsakna kan lantirna hun atan hman a ni thin a. He Kut kan hman thin hi kumin ah a hranin hmang thei lo mah ila he Kut a lo thlen hian kan hman chhan te kan hriat thar a pawimawh hle mai a. He ni hi hlimna ni, midangte tana harsatna thlentu ni lova anmahni tana kan inhlanna ni, kan sawi fo thin Zonun mawi vul thar lehna ni leh nundan mawi inzirtirna ni atan hman theuh thei ila a duhawm hle a ni.

Comments

Chhiar Hlawhte