Registrar of Marriage te tan Training neih a ni

Serchhip District chhunga Registrar of Marriage te tan nimin khan ni khat awh an hnathawh dan chungchang inzirtirna chu Serchhip-ah neih a ni.

Mizoram sawrkar Law and Judicial Department hnuaia Registrar General of Marriage buatsaih Serchhip District chhunga Registrar of Marriage Annual Training hi Serchhip Sub-Hqrs. YMA Conference Hall-ah neih niin Aizawl-a Law and Judicial Department atangin Lalfeli, Head Assistant chuan rawn hmanpuiin kal-khawm te zirtirna a pe a. Registrar of Marriage te chu khaw hrang hranga zirtirtu, Zirtirtu zingah pawh rintlak leh hna dang pek belh tlaka ngaih te an nih avangin an hna tha taka thawk turin sawrkar pawhin an lakah beiseina sang tak a neih thu a sawi a. Hetiang training hi kumtin buatsaih thin a nih anga buatsaih leh a nih thu sawiin, hetiang hun buatsaih hi chhawr tangkai tum turin a chah bawk.

Supreme Court thuchhuak ang leh chhan hrang hrang avangin Mizoram chhunga inneih te chhinchhiah ngei ngei tur a nih avangin Mizoram Legislative Assembly chuan India ram Republic a nih kum 58-na ah Mizoram chhunga inneih te chhinchhiah ngei ngeina Dan, The Mizoram Compulsory Registration of Marriage Act and Rules, 2007 a siam a, he Dan hi Mizoram pumah April 1, 2008 atanga hman niin he Dan hian Hnam, Chi leh Sakhaw hrang hrang ten anmahni tihdan leh chindan pangngai anga nupui/pasal inneih bakah nupui/pasal inneih lehna te pawh a huam a. Mizoram sawrkar pawhin inneih te chhinchhiah tur hian Registrar of Marriage chu khaw tin leh Veng tinah ruatin Mizoram-ah 731 an awm mek a, Serchhip District-ah pawh 43 an awm mek bawk a ni.