COVID-19 hri kai mi 3 hmuh belh leh an ni

Niminpiah-a Mizoram-a Sample enfiah atangin COVID-19 hri kai mi pathum hmuhchhuah leh an ni a, Mizoram-a hri kai hmuh tawh chu 4468 an tling ta a ni.

Niminpiah-a Mizoram-a hri kai hmuhchhuah te hi Rapid Antigen Test hmanga Sample enfiah 415 atanga hmuhchhuah niin hri kai hmuhchhuah pakhat hi New Delhi atanga rawn haw, Lengpui Airport Screening Point-a hri kai hmuhchhuah a ni a, pakhat hi tunhnaia Guwahati atanga rawn haw, taksa-a hri kai lanchhuahna neih avanga Sample enfiah niin midang pakhat hi taksa-a hri kai lanchhuahna neilo leh tunhnaia zinchhuahna neilo niin Private Hospital-ah hri a kai tih hmuhchhuah a ni thung. Niminpiah khan ZMC Laboratory-ah Sample 5 enfiah niin hri kai hmuhchhuah an awm lo a, District hrang hranga TrueNat Laboratory-ah Sample enfiah a awmlo thung.

Nimin khan Mizoram-ah hri kai enkawl mi 6 te chu hri lakah fihlimin anmahni enkawlna hmun atanga chhuahtir an ni a, heti hian nimin tlai dar 5:00 thleng khan Mizoram-a hri kai hmuh tawh chu 4468 niin an zinga 4434 te chu enkawl dam an ni tawh a, hri kai hmuhchhuah atanga za zela 99.24 te chu enkawl dam ni tawhin tunah hian hri kai enkawllai 23 an la awm a, nunna chan mi 11 an awm tawh bawk a ni.