Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar thenkhat :

Panchayat Bhawan hawng

Local Administration Department changtu Minister, K. Lalrinliana chuan nimin khan Ko-lasib Electric Veng-ah Rastriya Gram Swaraj Abhiyan (RGSA) hnuaia Panchayat Bhawan chu a hawng a, he hunah hian LAD Minister chuan Mizoramah chuan Panchayati Raj inkaih-hruaina zawm famkim chiah ni lo mah se, Village Council ruangam kalpui danah PRI kalphung tam tak chu zawm ve tan a nih tawh thu a sawi a, VC term pawh kum 5 a nih tawh thu leh Seat awm zat ang zelin hmeichhia te tan Seat zuah sak thin a nih thu a sawi bawk. Panchayat Bhawan, hawn tak hi RGSA Scheme hnuai a cheng nuai 20 seng a sak a ni a, bialtu MLA, K.Lalrinliana’n Electric Veng YMA-te Community Hall sakna tur atana a pekna hmun, ram awl la awm chu YMA te hian VC-te hnenah an pe ve leh thung a ni.


Beihpuithlakna tur hawng

Thisen tlakchhamna (Anemia) laka Mizo-ram mipuite kan fihlimna tura beihpuithlakna tura ruahmanna, ‘Anemia Mukt Bharat Strategy for Mizoram State’ chu nimin khan Health Minister, Dr. R. Lalthangliana chuan Aizawl-ah a hawng a, he programme in a tum ber chu kum 2022 ralhma a naupang zinga Anemia vei, a lo berah kumtin 3% a tih tlemte, tleirawl (kum 15 - 19), hmeichhia naupai hun (kum 15–49), raipuar leh nu nau hnute pe mek zinga Anemia vei kumtin 3% a tihhniam a ni.


MSU in lawmthu an sawi

Mizo Students’ Union (MSU) Gen. Hqrs. chuan Mizoram Rural Bank hnuaia Office Assistant paruk (6) chhawr mêkte Service Regulation, 2010 leh Appointment Rule, 2017-in a phût ang thiamna thla 18 chhûnga an neih theih loh avânga an Service tihtâwp a nih theih nâna Mizoram Rural Bank Management te March thla chhung hun an lo pek tawh anga MRB Management lamin March 29-a an Service Termination Order a siamfel ta chu lawmawm an tih thu thuchhuah siamin an tarlang.


Website tha thlanna nei

Nimin khan Mizoram sawrkar-a ICT Department bultumin SAD Conference Hall-ah ‘Government Website Excellence Award, 2020’ sem a ni a, Department of Information & Public Relations chuan lawmman pakhatna dawngin Rs. 2,00,000/- an dawng a, Department of Personnel & Administrative Reforms in lawmman pahnihna Rs. 1,00,000/- leh Department of Health & Family Welfare in pathumna Rs. 50,000/- an dawng a ni.


ART Centre 6 hawng

Health & Family Welfare Minister, Dr. R. Lalthangliana hovin nimin khan Assemble Annex Conference Hall, Aizawl-ah District paruk - Siaha, Lawngtlai, Serchhip, Hnahthial, Khaw-zawl leh Saitual District-a Anti-Retroviral Therapy (ART) Centre thar hawnna neih a ni a, ART Centre hi HIV positive te enkawlna leh damdawi an lakna hmun a nih piah lamah an rilru hahna leh harsatna an inbunruahna hmun niin ART damdawi hian HIV hrik taksaa lo pung zel tur a veng a ni.


ASEP in Tuirial lui a chhe mek niin an sawi

Association for Environmental Preservation (ASEP) General Hqrs. chuan an thudawn bawhzuiin Shivalaya Construction Company Pvt. Ltd. ten Tuirial-a Balu an silna, Washing Plant chu a hmunah an enfiah tih an sawi a, an hnathawhna hmun atang hian an bawlhhlawh zawng zawngte chu Tuirial-ah a luang lut vek nia sawiin, hei hian tuinu leh dûm kawi, diak ban tak siamin, Tuirial lui chu a hnawhkhat vek tih an sawi a. Li thuk leh tha, patling ban pil zak ni thin, lui-a nungchate chenna ber chu a hnawh khat vek nia sawiin, Luidung nungchate tan nun khawchhuah ngaihna a awm ta lo niin an sawi. ASEP chuan Tuirial khawtlangin an humhalh bik chin phei chu mihring tan pawha dai ngam lek loh khawpin dûm hian a hnawh nia sawiin, tun dinhmunah Tuirial lui hian chhanchhuah a mamawh hle niin an sawi bawk.


Special Vendors Development Programme hawng

Mizoram Handloom & Handicrafts Development Corporation Ltd.(ZOHANDCO) buatsaih, ‘Special Vendors Development Programme (VDPs) under National SC/ST Hub Scheme’ chu nimin khan Home Minister, Lalchamliana’n Aijal Club ah a hawng a. Hnam hnufual, Scheduled Caste leh Scheduled Tribe te hmasawnna tura VDP duan a nih dan tarlangin, he programme hian Mizoram-a kut hnathawktute tan hmasawnna a thlen ngei a duhsak thu Minister chuan a sawi bawk.

Comments

Popular News (Last 30 Days)