Anganwadi sakna tur sum bo nia sawi chhui dawn

Social Welfare Minister, Dr. K. Beichhua chuan Champhai-a Anganwadi sakna sum bo then ni-a sawi chu zawnchhuah a, a tul anga hmalak a nih tur thu House a hrilh.

Congress Legislature Party Leader, Zodintluanga Ralte chuan kum 2019 khan Champhai North Constituency-ah Anganwadi Centre 14 sak that nan cheng nuai 2 theuh pek a ni a, Contractor hnenah Rs. 150,000/- zelin hna hi thawh tir an ni a, Anganwadi chei thatna tura sum pek zawng zawng atanga hnathawh tirna ah hian cheng nuai 7 a kim ta lo tih sawiin, a kim lohna cheng nuai 7 hi Sept. 29, 2019-ah Lalhmangaiha hminga lakchhuah a ni a, he sum Contractor-te hnena lut si lo hi zawng chhuakin, hrem ngai an awm a nih chuan a hrem thei ang em tih a zawhna a chhannah Dr. K. Beichhua hian he thil hi a vawikhat hriatna a ni tih a sawi a, a tul anga hmalak a nih tur thu a sawi a ni.

Hei bakah hian Dr. K. Beichhua chuan Sethawn-a ruihhlo ngaite enkawlna tur, Jordan Centre chu cheng nuai 920.72 sengin tihchangtlun mek a ni tih sawiin, Budget Session zawh hunah hawn theih beisei a nih thu zawhna chhangin a sawi bawk a ni.