Latest News

Budget-ah Opposition bial leh Ruling bial tana sum dah hran a awmlo - PC. Laltlansanga

Serchhip bial-a Assembly bye-election lo awm tura Congress Candidate tur, PC. Laltlansanga chuan Mizoram budget-ah Opposition bial leh Ruling bial tana sum dah hran a awmlo tih sawiin, MNF party mi te pawhin eptu bial nih avanga kan chanvo tur kan chanloh a awm an hriat a rinloh thu a sawi.

Nimin-a Serchhip Press Club-a thuthar thehdarhtute a kawmna ah Indian National Congress (INC) in Serchhip bial bye-election lo awm tura an candidate tur PC. Laltlansanga chuan Serchhip bial-a bye-election lo awm turah Ruling bial nih chungchang sawiin, Opposition MLA bial nih avanga rep char tur nia inngai an awm tih a sawi a, Ruling bial leh Opposition bial nih danglamna a awm lo tih sawiin, tu pawh tling se an thil tih theih a inang tlang tih a sawi a. Kum 2003-a MLA inthlanpui ah khan MNF in sawrkar-na siamin Serchhip bial chu eptu bial a ni tih sawiin, khatih hunlai pawh khan MNF party mi te hian eptu bial kan nih avanga kan chan tur kan chan takloh sawi tur an neih an hriat a rinloh thu a sawi a. Mizo-ram Budget chu Ruling bial tan bik a nih loh thu leh Mizoram tan a nih avangin Congress sawrkar lai-a NLUP an kalpui lai pawhin eptu bial nih avanga pek ve loh an awm ngailoh thu a sawi bawk a ni.

PC. Laltlansanga chuan Serchhip bial chu hun rei tak Chief Minister bial a lo ni tawh tih pawh sawiin, “Kan hotupa, kan pu ber Pu Lal Thanhawla'n Chief Minister ni chungin rei tak min bial a. Hmasawnna tam tak kan neih phah a. Chutihrualin kan duhthusam anga hmasawnna thlen lohna pawh a awm ngei ang. Insiamthat kan ngaihnaah te pawh theihtawp chhuaha bial chhung hmasawn nan thawk ho zel turin bial mipuite ka ngenin ka sawm a ni,” tiin Serchhip Bial hmasawnna atana a hma lo lak tawh zozai leh a hmachhawp, a tihhlawhtlin hman loh tam tak te tihhlawhtlin a nih theih nan Congress Party in Official Candidate atana an ruatna chu pawm a nih thu a sawi bawk.

Serchhip bial bye-election neih tura a khingpui te chu Party-a Vice President nilai leh Leader nilai te an ni tih sawiin, kawng tam taka a tlukloh turte an ni tih a sawi a, “Thil pakhat sawi duh ka nei a, chu chu - heng ka khingpui tur pa ropui tak tak pahnih te ai hian Serchhip Bial mipuite hi ka hrechiang a, an ni pahnih ai chuan in tan ka tangkai zawk ang tih hi a ni,” a ti.

Mizoram-a Assembly Constituency tam berah Bial chhung mi, mahni khawchhuak ngei MLA neih an intihhmuh thu leh hma an sawn pui thu pawh sawiin, “Tun tumah pawh hian kan Ruling party, MNF unaute pawh hian bial chhung mi candidate tur an zawng hmasa phawt a, an sawm te an remchan tak loh avangin hotu dang an rawn ruat ta a ni. Anni pawh hi bial chhungmi duhtute tho an ni a, vawi 2 lai bial chhung mi lo Candidate tawhtu an ni bawk a, lang lo lamah min thawhpui ngei kan beisei,” a ti.

PC. Laltlansanga chuan Pathian leh bial mipuite zara MLA atana thlantlin a nih chuan, mipui nawlpui, mirethei leh harsa zawkte tan pawh ban phak MLA nih a tum thu a sawi a, “MLA Fund, kum 3 hman tur la awm, cheng nuai 450 lai mai hi miretheite tan a tangkai thei ang berin hman kan tum ang a. 'Poor Fund' (Mirethei pual) kan siam ang a. Damlo, Aizawl leh hmunpui panpui ngai, sum harsatna a vanga damdawi In lian pan theilo te tan kan hmang ang,” tiin “Serchhip Bial Bye-Election kan hmachhawn thuai dawn a, in tana theihtawp chhuah turin ka rawn in pe a, Serchhip bial mipuite in khawngaih vote ka rawn ngen tak meuh che u a ni,” a ti bawk.

He hunah hian Serchhip East Block Congress Committee President, R. Vanlaldula chuan Serchhip bial-a Congress Candidate tura PC. Laltlansanga rawttu chu Thenzawl lam an ni tih sawiin, an lungrual tlang hle tih a sawi bawk.

Comments

Chhiar Hlawhte