Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

MJA Serchhip District Member ten Serchhip District Jail an tlawh

Serchhip-a MJA Member thenkhat te chuan nimin khan Serchhip District Jail tlawhin an hmalakna leh hnathawh dan te an thlir.

Serchhip District Jail tlawhtu MJA Member te hi Serchhip District Jail Superintendent, Laldingliana Chinzah chuan lo dawngsawngin tunhnaia an hmalakna hrang hrang te a lo hrilh a, District Jail Superintendent chuan Serchhip District Jail-a tang te tan Vocational Training Centre buatsaihin tunah hian Puan tah leh Puan thui zirna an buatsaih thu a sawi a. Hemi atang hian Jail tang te thawmhnaw tur tah-a thuiin Mizoram District Jail hrang hrangah thawnchhuah theih an beisei thu leh an hotute hnenah pawh hemi chungchang hi an thlen tawh thu a sawi a ni. Hei bakah hian thiamhnang deh lamah pawh hun rei tak zirna an lo buatsaih tawh thu sawiin, amaherawh chu tunah chuan kalpui chhunzawm theih rih a nih loh thu a sawi bawk.

Hei bakah hian Serchhip District Jail Superintendent chuan faina kawngah pawh nasa taka hma an lak thu sawiin, nikum a Faina Hapta puala sawrkar Office fai thlanna neih ah lawmman pathumna an dawn thu a sawi a, hei hi Serchhip District Jail hawn a nih hnua helam kawnga lawmman an lak hmasak ber a nih thu a sawi a. Tunah hian an hmalakna hi chhunzawm zelin tuichhe paihna pawh tha zawka an siam thu sawiin, Faina Hapta-a endik lai aia hma an sawn tawh thu a sawi a, faina kawngah hian District Jail-a thawkte leh Jail-a tang ten theihtawp an chhuah thu a sawi bawk.

Serchhip District Jail Superintendent chuan hri leng avanga hun rei tak Jail-a awm te tlawh leh kan theihloh chu tun thla ni 17 atang khan tlawh phalsak an nih tawh thu pawh a sawi a, tunah chuan Jail-a tang te intuaitharna atan rawngbawlna nei duh tan pawh hun a awm theih dawn thu sawiin, amaherawh chu hri leng avanga inkaihhruaina an siam te erawh zawm sak a tul thu leh hri leng laka Jail tang te himna chu an ngaih pawimawh thu a sawi bawk.

Tun dinhmunah Serchhip District Jail-ah hian tang mi 36 awm mekin Mipa 32 leh Hmeichhia 4 an ni a, Mipa 26 leh Hmeichhia 4 te hi thubuai ngaihtuah lai niin Mipa 6 te hi an thubuai chinfel tawha thiamloh chantir te an ni. Serchhip District Jail-ah hian Superintendent hovin thawktu midang 20 an awm mek a ni.

Comments

Popular News (Last 30 Days)