Latest News

Mitthi zingah hmeichhia aiin mipa an tam zawk

Kumtin-in Mizoram-a mitthi zingah Hmeichhia aiin Mipa an tam zawk zel tih Chief Minister, Zoramthanga’n a sawi.

Assembly inkhawm kal lai meka Independent Member, VL. Zaithanzama zawhna chhangin Chief Minister, Zoramthanga chuan, kum 2016 atanga kum 2019 inkar, kum nga chhung khan Mizoram-ah kumtin Hmeichhia aiin Mipa thi an tam zawk zel a, chutih lai chuan nausen piang zingah Mipa tam zawk thin mah se an tam zawkna hi a tam lo hle tih a sawi a ni. Chief Minister Zoramthanga chhanna atanga a lan danin, kum 2016 khan nau piang mipa 11,456 leh hmeichhia 11,041, an vaiin 22,497 awmin, mipa 415-in an tam zawk a, kum 2017-ah nau piang mipa 10,793 leh hmeichhia 10,638 awmin, mipa naupang 335-in an tam zawk a. Kum 2018-ah nau piang mipa 10,685 awmin, hmeichhia 10,299, an vaiin nau piang 20,984 an awm a, a kum hmasa 2017 aiin nau piang an tlem zawk a. Kum 2018-ah pawh nau piang thar zingah hian hmeichhia aiin mipa an tam zawk leh a, mipa naupang 386-in an tam zawk a ni. Kum 4 chhunga nau piang awm tam ber kum 2019-ah nau piang 23,808 awmin, chung zinga 12,057 chu mipa niin, 11,751 chu hmeichhia an ni a, mipa piang 306 an tam zawk bawk.

Hetiang a nih lai hian mipa thi an tam zawk hle avangin Mizorama mihring awm zingah mipa aiin hmeichhia an tam chho zawk ta zel a. Vote nei thei zingah phei chuan kum engemawzat kalta atang khan mipai aiin hmeichhia an tam zawk ta zel a ni.

Comments

Chhiar Hlawhte