Latest News

Chanchin thar thenkhat :

MSCU Office leh Training Centre building hawng

Co-operation Minister, C.Lalrinsanga chuan nimin khan Mizoram State Co-operative Union (MSCU) Office leh Training Centre building thar, Aizawl Bara Bazar, Dawrpui-a mi chu a hawng. Mizoram State Cooperative Union (MS-CU) hi ni 29.3.1975 khan din niin kum 46 chhung Assam Type building chu Office atan hman a nih hnuah kum 2018-2019 khan NEDP atangin cheng nuai 150 hmuh a ni a, kum 2019-2020-ah SEDP atangin cheng nuai 200 hmuh leh niin a vaiin cheng nuai 350 sengin building hi sak zawh a ni ta a ni. He building hi chhawng 6-a sang a ni a, Nodal Agency-ah MSCU niin Implementing Agency-ah F.K.Construction, Tuikual South hman a ni.


DRO Office hawng thar

Mizoram Youth Commission (MYC) Chairman, Dr. Vanlaltanpuia MLA chuan nimin khan Khawzawl-ah ‘District Research Officer's Office cum Office of the Assistant District Registrar's Office’ a hawng a, Office thar hawnna inkhawm Zaingen YMA Hall-a neih ah MYC Chairman chuan Khawzawl-a Statistic Office hawn a ni ta chu lawmawm a tih thu sawiin, Development hna reng reng hlawhtling tur chuan Research-based a ngai a, chutiang hnathawk tur leh pian atanga thih thleng documents pawimawh siam leh buaipui thei tur District Economics & Statistics Office hawn a ni ta chu lawmawm a tih thu a sawi bawk.


CM in hmalakna te enfiah

Champhai-a cham mek Chief Minister, Zo-ramthanga chuan nimin khan Zokhawthar Land Customs Station chu tlawhin a tihchangtlun leh tihlenna (upgrade) tura ruahmanna te a enpui a, hei bakah hian Zotlang-a Truck Terminal sak mek te, World Bank road kawng laih mek te, Indo-Myanmar Border Trade Township Melbuk khua a Trade & Commerce hmunhma te pawh a hmunah a tlawh bawk.


Hawla’n sawrkar a ngen

Mizoram Pradesh Congress Committee (MPCC) President, Lal Thanhawla chuan Myan-mar-a buaina thleng avangin Myanmar an nunna humhim turin Mizoram-ah raltlan engemawzat an awm ta tih sawiin, heng mite enkawl nan a tul apiang ti tur leh, NGO hrang hrang hmalakna te chak zawka umzui turin MNF kaihhruai Mizoram sawrkar a ngen thu thuchhuah siamin a sawi.


All Party Meeting koh duh

Peoples Conference (PC) Party chuan nimin khan Mizoram Chief Minister hnenah lehkha thehlutin Myanmar atanga Mizoram-a raltlan rawn lut an tam zel avang leh an lo lut zel dawn nia a lan avangin heng raltlan te chhawmdawl dan tur hi ngaihtuah thuai thuai ngai an tih thu an sawi a, hemi chungchangah hian All Party Meeting ko turin an ngen nghal bawk.


Chief Minister in kan tih ve ngei tur a nih thu sawi

Chief Minister Zoramthanga chuan mahni sahimna zawnga lo kal, kan unaute tuamhlawm chu kan tih ve ngei tur a nih thu a sawi. Chief Minister, Zoramthanga hian Champhai tlawh mekin niminpiah tlai khan Circuit House-ah amah lo lawmna hun hman a ni a, he hunah hian Myanmar atanga Mizoram rawn raltlante chungchang sawiin Chief Minister chuan, loh theihlohna avanga mahni sahimna zawnga lo kal kan unaute tuamhlawm chu kan tih ve ngei tur a nih thu a sawi a. Sawrkar laipuiin lo dang tura thu a pek chungchangah Union Home Minister-ah thu thlenin, mangang a lo raltlan te ei tur pe theilo, riahna pe theilo nih chu mihring nihphung a nih loh thu thlenin, ngaihtuahna thar seng tura a tih thu leh, Delhi-ah sawrkar laipui hotute dawr turin palai a tirh thu te a sawi bawk.

Comments

Chhiar Hlawhte