YMA in kawng siam mek te a hmunah an enfiah

Serchhip Sub-Hqrs. YMA Vigilance & Monitoring Committee chuan Zirtawpni khan Chhingchhip atanga Hualtu panna kawng siam mek tlawhin Chhiahtlang atanga Lamchhip panna kawng siam hna thawh mek an enfiah bawk.

Serchhip Sub-Hqrs. YMA Vigilance & Monitoring Committee hruaitute hi Hualtu Branch YMA te chuan lo dawngsawngin an khaw kawng siam hnathawh a muan êm avanga mipui an hmanhmawh tawh thu an lo hrilh a ni. Chhingchhip atanga Hualtu panna kawng hi PMGSY hnuaia siam niin, KM 18-a thui a ni a, PCC Flooring niin, Metre 3-a zau, Inches 4-a chhah-a siam a ni a. Tun dinhmunah hian KM 3 chu kut la thlâk miah loh niin Hualtu Branch YMA hruaitute chuan an sawi a. An kawng siam hmasak tawh lam hmun thenkhat te pawh Motor rit phurin an zawh ve reng bawk avangin duhthu a sâm tâwk tawh lo hle bawk.

Kawng siam hnathawktu, Contractor, C. Lalpianthanga, Aizawl Dinthar Veng chuan an siam hmasak lam, tun dinhmuna tha tâwk tawhlo te hi GSB tih that leh a, Cement-a chhûn that leh vek an tum thu a sawi a. He kawng siam hna hi kum 2014, kum tâwp lam atanga thawh tan a nih thu sawiin, a hun rei tawh dan ngaihtuaha tun thlenga an la thawk zo thei lo chu hrehawm a tih thu leh Sub-Hqrs. YMA hruaitute meuhin an enpui a ngai ta chu zahthlâk a tih thu a sawi rualin, anmahni chhungkaw lama harsatna nasa tak an tawh avanga thawk sâwt thei lo an nih thu a sawi bawk.

Contractor chuan sum nghah a la neih thu pawh sawiin, hei hi an lâk theih veleh chak zâwka hna hi kalpui theih a inbeisei thu a sawi a. Chutihrualin, he a sum nghah leh a beisei hi a hmu thei ta mai lo a nih phei chuan amah chu inhnuhdawh a, Department kut-a pêk tawh mai pawh a pawi tih loh thu a sawi bawk a. Tunah hian amah hian Hualtu-ah In luahin a awm chilh mêk a, kawngbá sám fai ngai leh kawng khuar chhe lai repair hna an thawh reng thu a sawi bawk.

Serchhip Sub-Hqrs. YMA hruaitute chuan Chhiahtlang to Hmui-fâng Road (via Lamchhip), FK Construction Compant te hnathawh lai chu a hmunah kalin an en a, hnathawktu te hnathawh ah lungawithlâk viau-a an hriat thu an sawi a. Hetihrual hian hnathawktu te hnathawh tibuai thintu, Road Block a nih laia a rûka lo kal lui thin ten kawng siam hna an tihchhiat te pawh an en nghal a. Pawi an tiin, tun hnu-ah chuan hetiang thil hi thleng tawh lo se, Road Block a nih lai chuan tuma'n kal luih tum tawh lo se an duh thu an sawi bawk.

YMA hruaitute hian KRAM Infracon Pvt. Ltd. hotute pawh an hmunpui-ah kawm nghalin Sailiam leh Dâwngzâwl inkâr, Vety Tuikhur bul-a an Culvert siam, Motor-in a rah chhiat chu lirthei khalhtu te tana a hlauhawm theih avangin siam tha thuai turin an ngen bawk a ni.