Latest News

Chanchin thar thenkhat :

DRDA hawng vek dawn

Rural Development Minister, Lalruatkima chuan Mizoram-a District thar 3-ah thla thar April ni 1 atangin District Rural Development Agency (DRDA) dah vek tum a ni, a ti. Nimin Assembly thutkhawm ah Lalrinsnaga Ralte zawhna chhangin RD Minister chuan District thar pathum- Saitual, Hnahthial leh Khawzawl District-ah DRDA dah tum a nih angin thlar thar April ni 1 atanga Office kai tan turin DRDA dah vek a ni dawn, a ti a. Hei bakah hian RD Minister chuan MzSRLM hnuaiah DDUGKY Scheme hmangin thingtlang thalaite thiamna pein ei-zawnna hmuhsak tura hmalak a ni, a ti a, hemi hmang hian thalai 700 chuang training pek tawh niin, thalai 427 ten hna an hmu tawh tih a sawi bawk.


Inkhawmna ah zai la remlo

Mizoram sawrkar-a Disaster Management & Rehabilitation Department chuan nimin khan hri leng vanga mipuite kaihhruaina hman mek tih danglamna thuchhuah a siam a, Health Minister hova thuneituten zan lama inkhawm leh zai an rel tawh laiin inkhawm chhungin zai leh hla sak phal a nih loh thu an tarlang a ni. Kaihhruaina thar ah hian chawlhkar khatah zan 2 inkhawm buatsaih theih a ni dawn a, Biak In-a inkhawm tumkhatah mihring leng zat zaa 50 aia tam punkhawm loh tur a ni a, Sunday School chu pawl-a inthen lovin Pulpit atangin khaikhawm tur a ni ang. Inkhawm zawng zawngin hmai tuam theuh tur a ni a, a luhna ah kut tihfaina dah tur a ni a, inkar hlata thut dan ruahman tur a ni bawk ang.


Home Minister ah thlen

Peoples' Conference (PC) Party chuan nimin khan Mizoram sawrkar-a Home Minister, Lalcham-liana hnenah Myanmar atanga râltlana Mizorama lo lutte tana Refugee Camp siam thuai tur leh heng kan unaute atanga venthawn thilah COVID -19 laka kan him nana hmâ lo la thuai turin ngenna an thlen a, Home Minister hi Assembly Session-ah a kal avangin P.A. to Home Minister, Lalrinzuali chuan a lo dawn sak a ni.


A hun tak kawng siam zawh loh chhan CM in sawi

PWD changtu Chief Minister, Zoramthanga chuan a hun taka Kawng siam zawhloh tam lutuk chhan zingah Mizoram ruahtui tam vang leh rin lawk loh leimin a tam thin vang niin a sawi. Nimin a Assembly thutkhawm ah Vanlalhlana’n PWD hnuaia hnathawh, Project 192 lai a hun taka zawh a nih loh chhan a zawhna chhangin Chief Minister, Zoramthanga chuan, Project buaipui chhungin thil man a lo to hman a, rate hluia tih theih tawh loh ennawn ngai thin chuan hna a tibuai thin a ti a, hei bakah hian ruahsur vanglaia kawng siam hleih theih a nih loh thin avangte, a hmaa hriat lawk loh leimin thar a thlen thin avangte in a hun takah hna zawh a ni lo thin, a ti.

Hei bakah hian Chief Minister chuan, State pawn atanga Tender chhangtu Contractor thlan ten an rin ang ni loa Mizoram-a hna an thawh chak theih loh avangin hna an tlai fo thin tih a sawi bawk a, hna zuzi ral leh pawh a tam thin tih sawiin, hetiang harsatna pumpelh turin sawrkar in theihtawpin hma a la a, a hun taka zawh a nih theih nan hmalak zel an tum, a ti bawk.


Minister 2 te demand pawm

Nimin-a Mizoram Legislative Assembly thut-khawm ah Minister pahnih ten an Department enkawlna tura sum an ruahman chu sawiho a nih hnuah pawm a ni a. Heng sum ruahman an pawm tak te hi Dr. R. Lalthangliana chan Department pathum, Higher and Technical Education, Health and Family Welfare leh Commerce and Industries Department tana sum ruahman, a vaiin Rs. 960,82,77,000 leh Lalruatkima chan Department pathum, Land, Revenue and Settlement, Information and Public Relations leh Rural Development Department tana sum ruahman, a vaiin Rs. 480,75,47,000/- te a ni. Vawiin thutkhawm ah Minister 2- Lalchamliana leh Robert Romawia Royte te demand sawiho leh a ni ang.

Comments

Chhiar Hlawhte