Latest News

Hetiang thu sawi turin CM lo kal tawh suh se - PC. Tlana

Serchhip bial Assembly bye-election neih tura Indian National Congress (INC) Candidate, PC. Laltlansanga chuan, “Khawi Veng emaw-in an nuihzat mai ang che u tih sawi tur mai mai chuan Chief Minister hi lokal tawh suh se,” a ti.

Inrinni-a Thenzawl-a Serchhip West Block Congress Party, Thenzawl Upa Wing te nen inkawm-hona an neih ah PC. Laltlansanga chuan tunhnaia Thenzawl leh Serchhip tlawhtu MNF Party President, Chief Minister ni bawk Zoramthanga chuan bial hmasawnna tur pakhat mah a sawi lo tih sawiin, mipui te chu sum tam zia hlir a sawi khum a, a takah sum a awm si lo tih a sawi a. Bial leh ram hmasawnna sawi tur hre lovah puhin, “Khawi Veng emaw in an nuihzat mai ang che u tih sawi tur mai mai chuan Chief Minister hi lokal tawh suh se,” a ti a ni.

PC. Laltlansanga chuan kan sawrkar kal mek in Old Age Pension (Tar chawmna) sum ît khawpa sum a harsa ta chu a vanduaithlak takzet tih sawiin, “Tunah hian Tar pension kan tih mai hi thla ruk chhung atan, kum 80 chunglamin Rs. 3000 an lak thin chu Rs. 200 zel cut sakin Rs. 2800 chauh an pe a. Kum 80 hnuailam Rs. 1500 la thinte chu Rs. 100 cut sakin Rs. 1400 chauh an pe bawk a. Hetianga sawrkar ve riang ruangin tar chawmna sum tlemte pawh ît khawpa an pachhe ta mai hi zahthlak rawng a kai hial a ni,” a ti.

MNF Sawrkar chuan MLA an ngah thu pawh sawiin PC. Laltlansanga chuan, “MLA pakhat neih belh hi an mamawh lova, Mizoram in Oppositon MLA kan mawh tih hi mipui tam tak ngaihdan a ni a, khawi party atang pawhin tu pawh tling se, MLA fang vek kan ni dawn a, Ruling Party Candidate pawh thlantlin ni se Minister post a khat vek tawh a, kan innghahna tur chu MLA Fund tho vek a ni,” a ti a. Mizoram khawi MLA bial mah hi opposition bial an nih vanga hlam-chhiah an awm ngailo tih sawiin, hmasawnna hi chu a kal ngaiin a kal vek a ni, a ti bawk.

Comments

Chhiar Hlawhte