Serchhip DIC buatsaihin thla thum awh tur Puanban leh Puantah zirna neih tan a ni

Article 275 (1) of the Constitution of India hnuaia Puanban leh Puantah Training chu nimin khan Serchhip-ah neih tan niin Addl. DC, Lalmuansanga Ralte chuan he Training hi a hawng a ni.

He training hawnna District Industry Centre, Serchhip Darnam Veng-a neih ah hian Addl. DC, Lalmuansanga chuan Puandeh kaihhnawih chu eizawnna tling a ni tih sawiin, lehkha zir san ngawt chu eizawnna tling a nih loh thu leh thiamthil neih chu eizawnna atana pawimawh a nih thu a sawi a. Thiamthil neih chu a hlu tial tial tih sawiin, ram changkang ah chuan mihring kutchhuak te chu an hlutin a man a to zel tih a sawi a. Hei vang hian training tura thlan te chu an vanneihna hre reng turin a chah a. Pathian in keimahni ah theuh thil tih theihna tam tak a dah tih sawiin, chumi haichhuak tur chuan keimahni theuh kan pawimawh thu a sawi a. Handloom chu khawvel-a kan Culture phochhuahna pawimawh tak a ni tih sawiin, tunah pawh kan kutchhuak tam tak rampawn lama thawnchhuah a nih tawh thu a sawi.

Addl. DC Lalmuansanga Ralte chuan thil zir tura hmun pakhat-a kalkhawm theuh theuh leh zirtirna inang dawng te pawh a then an hlawhtlin laiin a then an hlawhchham tih sawiin, thenkhat ten tih tak taka an tih laiin thenkhat chuan kan ti mai mai thin tih a sawi a, sawrkar hmalakna a that zia hriaa theihtawp chhuah turin training a tel te chu a chah bakah hun laklawh-a training tawpsan lo turin a chah bawk.

He Training hi Ministry of Tribal Affairs sum hmuh atanga District Pan hnuaiah District Industry Centre, Serchhip in an buatsaih niin Batch hmasa berah hian mi 23 an tel a, thla thum (3) chhung training hi an nei dawn a, hemi atan hian Puanbanna Khawl pakhat leh Puantahna khawl  5 ruahman a ni bawk. He training hawnna hun hi Serchhip DIC-a Functional Manager, Elizabeth Lalremthangi Hmar chuan kaihruaiin DIC-a Training Supervisor, C. Lalthakima chuan training a tel turte inhmelhriattirna hun a hmang bawk a ni.