Latest News

Chanchin thar thenkhat :

Ni 3 chhung hri kai thar awmlo

Pathianni khan Mizoram-ah Sample 267 enfiah niin heng atang hian COVID-19 hri kai hmuhchhuah an awm lova, ni 3 chhung a zawnin hri kai hmuhchhuah an awm ta lo a ni. Pathianni khan ZMC Laboratory-ah Sample pakhat enfiah niin Rapid Antigen Test hmangin Sample 266 enfiah a ni a, heng atang hian hri kai hmuh-chhuah awm lovin District hrang hranga TrueNat Laboratory-ah Sample enfiah a awm lo thung a, Zirtawpni atang khan Mizoram-ah COVID-19 hri kai hmuhchhuah an awm ta lo a ni. Nimin khan Mizoram-ah hri kai mi 2 te chu enkawl dam leh niin heti hian nimin tlai dar 5:00 thlenga Mizoram-a hri kai hmuhchhuah chu 4428 niin heng zinga 4412 te chu enkawl dam an ni tawh a, hri kai hmuhchhuah atanga za zela 99.64 te chu enkawl dam ni tawhin tunah hian hri kai enkawllai 6 an la awm mek a, hri kai zingah nunna chan mi 10 an awm tawh bawk a ni.


VC mawhphurhna zirho

Nimin khan Champhai District chhunga Village Council President-te pualin VC mawh-phurhna leh tul dangte inhrilhhriatna hun I&PR Conference Hall, Champhai-ah neih a ni a, he hun hi Champhai DC, Maria CT. Zuali chuan hman-puiin kum 1954-a lal ban a nih hnuah ‘The Lushai Hills Autonomous District (Administration of Justice) Rules, 1953’ hmangin VC din a nih thu sawiin, sawrkar tih chu thil hrang daih ni lovin mipuite hi kan ni a, lungthu pathum; Dan hmanga rorelna Judiciary, dan kengkawhtu Executive leh mipui aiawh tura thlan Legislative-ah te a innghat tlat a ni, a ti a. VC te chu mipui thlan Legislative hnuaia mi, a tul leh remchan dan ang zela Dan siam theitute an nih thu a sawi bawk.


Pisa kai tur dan tum

Mizoram sawrkar in Higher and Technical Department Director atana hnamdang a dah MSU in an duhlohna an lantir mekah Vawiin atang hian H&TE Director Pisa kai tur hi dan an tum thu an sawi.


State thuneihna a ni lo - MNF

MNF Party chuan Election chu State thuneihna a ni lo tih sawiin, Election Commission of India thu thu a nih thu an sawi. Nimin-a thuchhuah an siamah MNF Party chuan tunhnaia Serchhip leh Thenzawl tlawha zin ZPM Vice President, K. Sapdanga’n Serchhip bial-a Assembly bye-election neih hun tur chungchangah ‘Election Commission lamah Mizoram sawrkar a la inpeih loh thu sawiin, bye-election hi a theih chen chen tikhawtlai turin rawtna a thlen tih thawm kan hria a, kan chhui chiang mek a ni,’ tia a sawi chu sawrkar tih hmingchhiat tumna ah an ngaih thu an tarlang a. Election chu State thuneihna a ni lo tih sawiin, “Election Commission  thuneihna a ni. State sawrkarin inthlan hun tur hi a duh hun huna a nawr ngawt theih pawh a ni lo. Tunah pawh Serchhip bye-election lo awm tur hi a hun tur tihfel a la ni lo a, engtikah nge tih pawh hriat a la ni lo. State dangah bye-election neih ngai tam tak an awm ve a, chung te nen chuan a ruala inthlan tir min tum a ni mai awm mang e tiin kan inrinsiak mek a ni. Tuten emaw an lo zu nawr theih a ni lo a, Election Commission of India thu thu a ni,” an ti.


MZP in Boxer an lawmpui

MZP General Hqrs. chuan LPS Fight Night March 6, 2021 zan-a khelh zawh takah Mizo tlangval, Lalrinsanga Tlau in Ghanian Boxer Eric Quarm hneha WBC Youth World Super Fea-therweight title kawnghren hrenga a champion thei chu an lawmpui takzet tih sawiin, Zofate tan mellung thar phuna Mizo thalai kan nep loh zia pholangtu chu an chhuang takzet tih an sawi a ni. Khawvel pum huap inelna a champion a ni chung leh India in WBC title inchuhna inhnek a thlen hmasak berah ropui taka hnehna chang Mizo tlangval chu Central Sawrkar-a Infiamna lama mawhphurtu leh enkawltuten lawmpuina leh duhsakna thu pakhatmah chhuah an neilo chu hriatthiam har an tih thu an sawi bawk.


MPCC Vice President ruat

Mizoram Pradesh Congress Committee (MPCC) President, Lal Thanhawla chuan nimin khan Aizawl-a Congress Bhavan-ah MPCC Vice President thar atan Lalsawta, Mission Vengthlang ruat a nih thu a puang a, MPCC thuneitu sang, Political Affairs Committee (PAC) Meeting-in ngun taka a ngaihtuah hnuah Vice President nilai H. Liansailova’n Kohhran rawngbawlna pawi-mawh tak, Aizawl Hmar Presbytery Moderator nihna a chelh tak avanga Party Vice President atanga chawlh rih a dilna chu a pawmsak a, Vice President thar atan Finance Minister hlui, Lalsawta chu PAC Meeting chuan ruatin nimin khan an Party President in a puangchhuak a ni.


Kalphung inbeihna niin sawi

ZPM Party chuan nimin khan Aizawl-a an Office-ah Chhung Inkhawm neiin he hunah hian an party Acting President, K. Sapdanga chuan Serchhip bye-election chu Kalphung thar duhtute leh Kalphung Hlui duhtute inbeihna a ni tih a sawi a. An khingpuite hmanraw hman thiam ber chu vote thlak dawn hnaia sum sem a ni leh ang tih pawh sawiin, “Sum sem hian Mizo-ram politics leh mipui rilru a tichhia. Sem tur nei pawh ni ila kan sem ve lo ang. Sum sem-a vote zawn hi dan kalh, mi rilru tihchhiatna a nih vangin, a ruka sem tum an awm chuan a rukin kan do ang a, a langa sem tum an awm chuan a langin kan do dawn a ni,” a ti  bawk.

Comments

Popular News (Last 30 Days)