Sawrkar hna Group B, C leh D lak turah zaa 5 zel Sports Quota atan hauh a nih thu sawi

Mizoram sawrkar-a Youth Affairs and Tourism Board Vice Chairman, TC. Pachhunga chuan Mizoram sawrkar in Sports a ngai pawimawh tih sawiin, Mizoram sawrkar hnuaia hna lak turah Group A tihloh ah chuan zaa 5 zel chu Sports Quota atan hauh a nih thu a sawi.

New Serchhip Badminton Club buatsaih, Serchhip District Badminton Association (SIDBA) Inter-Club Badminton Championship-2021 hawnna hun nimin-a New Serchhip Indoor Stadium-a neih a hmanpuina Youth Affairs and Tourism Board Vice Chairman, TC. Pachhunga chuan Mizoram sawrkar in infiamna lama hma a lakna hrang hrang a tarlanna ah he thu hi a sawi a. Kum 2019-ah Mizoram sawrkar chuan ala neih ngailoh ‘Sports Policy’ a siam thu sawiin, Sports chu Industry Status-ah hlankai a nih thu leh India ram State te zinga hetiang ti hmasa ber a nih thu a sawi a. Mizoram sawrkar chuan a hnuaia hnaruak lakna turah Group B, C leh D-ah te chuan Department zawng zawngah za zela 5 zel chu Sports Quota atan hauh a nih thu a sawi a. Zirna lamah pawh Sports chu Co-Curricular Activity a nih thin laiin New Education Policy siam thar ah chuan Sports chu Subject-ah betin tun aia liana kalpui zel a ni dawn tih a sawi bawk.

Youth Affairs and Tourism Board Vice Chairman chuan Sports-ah hma kan sawn zel tih sawiin, infiammi ten Olympic-a te Medal an lak-a khawvel hriata Mizo te min chawimawi chu kan hmathlir a nih thu sawiin, tunah hian Mizo infiammi pahnih- Lalremsiami (Hockey) leh Jeremy Lalrinnung (Weightlifting) te chu Tokyo Olympic-a tel tura an inbuatsaih mek thu a sawi a. Sawrkar pawhin Lalremsiami inbuatsaihna atan cheng nuai 20 leh Jeremy Lalrinnunga inbuatsaihna atan cheng nuai 15 a pek tawh thu sawiin, Medal pawh an rawn hawn ngei an beisei thu a sawi. Tun tum intihsiakna a tel te pawh tih tak tak nen an ti a nih chuan Badminton chu eizawnna tling a nih thu sawiin, khawpui mi tan chauh ni lo pawh hlawhtlinna a awm thu a sawi a, Mizoram leh India ram aiawh ni thei tura inpuahchah tura chahin, New Serchhip Indoor Stadium leh P&E Veng Badminton Hall-a Carpet phah an dilna pawh kumin chhunga phah tura hmalak a nih tur thu a sawi bawk.

SIDBA Inter-Club Badminton Championship-2021 hawnna hun hi New Serchhip Badminton Club President, K. Laltlanmawia chuan a kaihruai a, he hunah hian SIDBA President, John Zorammawia pawhin hetiang intihsiakna buatsaih a ni chu lawmawm a tih thu sawiin, thla hnih vel chhungin Tournament pui tham tak buatsaih leh tum a nih thu a sawi bawk.

Nimin-a tan tak he intihsiakna ah hian Badminton Club 8 atangin Team 47 an tel dawn a, Category 7-ah inelna neih tur a ni ang.