Latest News

MLA ten TB natna umbo dan tur an zirho

Nimin khan Assembly Conference Hall-ah MLA te pualin tunlaia India ram leh Mizoram in natna kan hmachhawn lian ber pakhat, Ngawr (Tuberculosis) umbo tura beihpuithlakna neih a ni.

He inzirtirna hunah hian India ram leh Mizoram-a Ngawr natna dinhmun tarlan a ni a. Zirchianna atangin India ramah nitin Ngawr natna vei thar mi 6000 awmin mi 600 vel thi ziah ang an ni a. Mizoram-ah chuan kum 2015-2020 chhung khan TB natna vei hmuhchhuah 14,639 (kum 2015-ah mi 2088, kum 2016-ah mi 2149, kum 2017-ah mi 2508, kum 2018-ah mi 2602, kum 2019-ah mi 2996 leh kum 2020-ah mi 2296) an awm a, kumtin-a TB vei hmuhchhuah atanga enkawl dam zat hi kum 2015-ah 85%, kum 2016-ah 86%, kum 2017-ah 88%, kum 2018-ah 85%, kum 2019-ah 93% leh kum 2020-ah 78% an ni. Ngawr natna vei zinga HIV positive awm zat hi kum 2020 khan 13% an ni a, hetihlai hian National Average chu 0.22% a ni thung a, India ramah kan dinhmun a chhe ber a ni. Ngawr natna thihpui hi Mizoram-ah kum 2015-ah mi 38, kum 2016-ah mi 35, kum 2017-ah mi 29, kum 2018-ah mi 51, kum 2019-ah mi 56 leh kum 2020-ah mi 49 an ni.

Mizoram-ah chuan Ngawr natna umbo kawngah Mamit District in titha berin tunah hian TB Free Certification-ah Bronze Medal Category dawng turin endik mek an ni a. District thar 3 leh Serchhip District tih loh District dang 8-ah District TB Centre awmin Anti-TB Drugs a thlawna pekchhuah reng a ni. Nimin inzirtirna hunah hian WHO Sustainable Development Goal-ah kum 2020 ralhma a TB natna umbo a tum laiin India ramah chuan kum 2025 ralhmaa umbo tum a nih thu sawilan niin MLA te tanlakna turte pawh sawiho a ni bawk.

Comments

Popular News (Last 30 Days)