Latest News

PM hovin COVID-19 hri leng leh hri danna pek thlirho

Nimin khan Prime Minister, Narendra Modi, Home Minister Amit Shah, State hrang hrang Chief Minister te leh UT Administrator ten rampuma COVID-19 dinhmun leh hri danna (vaccination) kalpui dan chungchang te Video Conferencing kaltlangin an thlirho.

He thlirhona hunah hian Mizoram atangin Chief Minister, Zoramthanga aiawhin Health Minister Dr. R. Lalthangliana a tel a, Mizoram dinhmun leh vaccine mamawh belh chungchang thlenin, Mizoram dinhmun te leh COVID-19 vaccine pek dan dinhmun tlangpui leh vaccine mamawh belh a nih thu te a thlen a. Hripui dona kawnga Mizoram a hlawhtlin dan leh a chhan hrang hrang te a tarlang bawk.

He thutkhawm ah hian Prime Minister, Narendra Modi chuan Vaccination avangin mipuite inthlahdah thei kan ni lo tih sawiin, inkaihhruaina hrang hrang Sawrkarin a duan te uluk taka zawm leh ngaih pawimawh reng a la tul thu a sawi a, “Heng hi uluk taka mipuite kan hrilh leh kan zirtir reng hi a la ngai a ni,” a ti. Sample test chungchang sawiin Prime Minister chuan, State thenkhat ten RAgT an hmang tam niin a lang a, RT-PCR test tam thei ang ber tih hi duhthusam a ni, a ti a. District Level a hripui do nan Micro Containment Zone ngaihpawimawh a tul thu te, Vaccination Centre tihpun a tul thu te sawiin, Vaccine tih riral (wastage) tam ni a lang chu a veiawm tih a sawi bawk.

Home Minister, Amit Shah chuan Central Sawrkar leh State Sawrkar te thawhhona a that avangin COVID-19 hripui dona kawngah hlawhtlinna engemaw chen a awm hnuin tunhnai thla khat kalta mai atanga State 6-a COVID-19 case thar pung chho mek chu a ngaihtuahawm tih thu a sawi a. September 2020-ah chawhrualin ram pumah case thar 90000 chuang hmuh a ni a, February 2021-ah case 9000-ah a tlahniam a, mahse tunhnaiah nitin case 24500 vel hmuh a ni a, heng case zinga a tam ber chu State 6 atangin a ni a, he thil hi ngaihtuah ngai tak leh, a dona kawngah hmalakna tihchak lehzual a tul dawn tiin a sawi bawk.

India ramah hian COVID-19 hri kai nuai 114 chuang hmuhchhuah tawh niin, chung zinga nuai 2.34 chu hri vei mek an ni a. Hripui avanga boral mihring nuai 1.59 awm tawhin sample test tawh zawng zawng zat hi vbc. 23 chuang a ni tawh a. Mihring vbc. 3.51 hnenah COVID-19 vaccine pek an ni tawh a, heng zinga vbc. 1.38 chu kum upa lam leh natna benvawn neite an ni a. Khawvel pumah USA tih lohah chuan vaccine pek tamna ber ram chu India a ni. He Meeting-ah hian kumin March ni 1 leh March ni 15 inkar hian State 12-a District 70-ah hri punna hi za zelah 150 a nih thu te, 150% atanga 100% a pun belhna District 55 a awm thu pawh tarlan a ni bawk.

Comments

Chhiar Hlawhte