Assembly thutkhawm ah kum 2021-2022 Mizoram Budget cheng vbc. 11,148.89 pharh a ni

Finance changtu Chief Minister Zoramthanga chuan nimin-a Assembly thutkhawm ah kum 2021-2022 atana Mizoram sawrkar sum ruahman (budget estimate) cheng vbc. 11,148.89 chu House-ah a pharh a, hemi rual hian 2020-2021 chhunga sawrkar sum indaihlohna phuhrukna tur cheng vbc.2320.79 a pharh nghal bawk.

Nimin-a Assembly thutkhawm chhunzawm ah hian thutkhawm tan a nih veleh thildang ti lovin Chief Minister hian budget hi a pharh nghal a, Budget pumpui atangin hmasawnna hna thar thawhna tur, Capital Expenditure chu zaa 17.33 a ni a. Capital Expenditure hi mipui tana hmasawnna ruhrel hrang hrang dinna tur a ni a, hemi atan sum ruahman chu cheng vbc. 1,932.50 niin, hei hi Budget pumpui atanga zaa 17.33 a ni a, hei hi nikum Budget-a Capital Expenditure atan sum ruahman zaa 15.80 aiin, zaa 1.53 in a sang zawk a ni.

Sawrkar hnathawk hlawh leh pension senso, zirna, infiamna leh kawngpui enkawlna ang chi te, mipuite hnena Tui pekna senso leh sawrkar inrelbawlna chi hrang hranga sum hman tur chu Revenue Expenditure tia sawi a ni thung a, hemi atana hman tur hi cheng vbc. 9,216.39 dah a ni a, hei hi Budget pumpui atanga zaa 82.67 a tling a. Revenue Expenditure-a sum dah hi nikum Budget-a zaa 84.20 aiin, zaa 1.53 aiin a hniam zawk a. Hmasawnna hnathawhna tur, Capital Expenditure punna leh Sawrkar inenkawlna senso, Revenue Expenditure tlakhniamna hi nikum Budget aiin zaa 1.53 ve ve-in a pungin, a sang a ni.

Kum 2020-21 Mizoram Budget-ah hian SEDP atan cheng vbc. 400 dah niin, nikum lama dah cheng vbc. 513 aiin cheng vbc. 113-in a tlem zawk a, MNF Returnee-te chhawmdawl nan cheng vbc. 5 dah niin, Sawrkar kumthar a MLA-ten an bial chhunga hmasawnna hna an thawhna tur, Local Area Development Fund-ah cheng vbc. 60 dah a ni a. Co-operative Societies hnuaia Subsidy awma Loan lak theite tihpun nan cheng vbc. 10 leh Urban Local Body, Rural Local Bodies leh Autonomous District Council pathumte tan Grands-in-Aid chu Sawrkar kum kal mek 2020-21 zulzuia dah a ni a, hetihrual hian an sum dawn tur hi Second Mizoram State Finance Commission ruahman anga pek tur niin Second Mizoram State Finance Commission hi din tura hmalak mek a ni tih Chief Minister hian a sawi bawk.

Budget pharh paha thu a sawinaah Finance changtu Chief Minister, Zoramthanga chuan, COVID-19 hri leng vangin sum hmuh a tlem ruala a hmanna a pung ve zel avangin tunhmaa hmalak thinna ang kha a tul zual tak tak lo chu kalpui theih a ni rih dawn lo tih a sawi a. State Sawrkar sum hmuhna tipung tura tanlak a tul dawn hle tih a sawi bawk.
(Samuel Lalruatsanga Zonet News Reporter)