Education Minister in tlawh

School Education Minister, Lalchhandama Ralte chuan Inrinni khan Serchhip-a zirna hmun thenkhat te tlawhin School building tih changtlun dan turte leh building sak mek te a enfiah a ni.

Education Minister hian Serchhip DIET building zawm san dan turte leh an Hostel building sak te, Govt. Serchhip Higher Secondary School building sak mek te, Govt. Serchhip High School building sak mek te, Govt. Serchhip Chanmari Middle School leh Field Veng Primary School-te chu a hmunah kalin a tlawh a ni.

Heng zirna hmun pawimawh a tlawhna ah te hian Minister chuan amah lo dawngsawngtu te hnenah sawrkarin zirna a ngaih pawimawh avangin zirna hmunhma tihchangtlun dan kawng dap chhoh zel a ni, a ti a. Building hlui tawh sak that te, building tha awm sa te pawh a tul anga sak zawm tura hma lak chhoh zel a nih thu a sawi a. Sawrkarin zirna tih changtlunna tura hma a lakna te hi theihtawpa tawiawm turin khawtlang hruaitute a sawm a. Zirna siamtha turin hmun tinah zirna in hmun pawimawih a chan a, ngaih pawimawh a hlawh a ngai a ni, a ti. School building leh Hostel sak mek a tlawhna ah hian a satute chu drawing anga sa turte, a luahtu turte lung-awina tling khawpa sa turin a chah bawk.

School Education Minister-in Serchhip-a zirna hmun a tlawhnaah hian Er. H.Lalzirliana MLA, H. Biakzauva MLA, Lalhmachhuana Jt. Director School Education ten tawiawmin sawr-kar mi pawimawh ten an lo dawngsawng a ni.