Serchhip Sports Complex-a hmalak zel dan tur enfiahin sawihona neih a ni

Serchhip Sports Complex-a Synthetic Running Track phah chu a zim avanga Track Line rin theih a nih rih loh avangin nimin khan a hmunah enfiahin hmalak zui dan tur sawiho a ni.

Serchhip Sports Complex-a Synthetic Running Track phah hna thawh mekah hian tunkar atang khan Running Track Line rin hna thawh tan tum a ni a, amaherawh chu measurements lak ah a rual-a mi 6 tlan theihna khawp a nih tak loh avangin nimin khan Aizawl atangin UD&PA Department-a Executive Engineer, C. Malsawma leh Work Supervisor mi 2 rawn kalin Athletic Association of Mizoram atangin Sr. Vice President, David Lalthanngura Sailo a rawn kal bawk a, Sports Complex-a Synthetic Running Track phah mek hi hnathawktute nen measurement la tha lehin a tlinloh dan te an enfiah nawn leh a ni.

Hemi hnu hian District Urban Development Officer, Vanthangpuii Pisa-ah a kaihhruaina in hmalak dan tur sawihona neih zui a ni a, he hunah hian UD&PA Department-a EE, C. Malsawma chuan Serchhip-a Sports Complex siam hna thawhna tur hian kum 2008-2009 ah DPR siamin March 29, 2009-ah a thawhkhatna atan cheng nuai 81.53 hmuin hna hi thawh tan a nih thu a sawi a, he Project hi a tir atangin harsatna tam tak an tawh thu sawiin, a tira ruahman ah chuan Running Track tel lovin amaherawh chu a hnuah thil tha zawk duhna avanga tih belh zel a nih thu a sawi a. Tunah hian mipui hmang duh tam tak an awm tawh thu sawiin, Running Track la peihloh a nih avanga a vai-a hman theihloha ala awm reng chu a fuh tawhlo tih a sawi a, hei vang hian engtin emaw tih-a hmalak a tul thu a sawi bawk.

He Sports Complex hi peihfel a nih hunah District Sports Committee kuta hlan a nih dawn tih pawh sawiin, hemi hnu hian a tul anga tih changtlun zel tur niin District Bawrhsap kaihhruaina hnuaiah Management Committee pawh siam a nih tawh thu a sawi bawk a. District Sports Committee kuta hlan a nih hmain hnathawh tawh a tihthat ngai te tihthat a nih dawn thu sawiin, amaherawh chu tihthat hnua enkawltu awm lova dah leh erawh tha an tihloh thu a sawi bawk.

He sawihona hunah hian UD&PA Department aiawhte bakah Athletic Association of Mizoram leh Serchhip District Athletic Association hruaitute bakah Serchhip District Sports Committee hruaitute leh thuthar thehdarhtute an tel a, he huna tel te hian Running Track-ah hian International Standard Track Line chu rin ngei tha tiin hemi atan hian Running Track hi tihzauh ngei tha an ti a, a zauhna lam tur ni lo ah chuan Track Line hi rin tan phawt tha an ti bawk a, Track Line zauhna tur hian he hna thawktu Syncott International Ltd. ten Estimate lo siam se an tih bakah tuna hnathawh tawh, chhe leh tawh te pawh siamthat a nih theihna turin ruahmanna siam nise an ti bawk.