MJA leh Assam Rifles in Media Conclave an nei

Serchhip-a Battalion hmunpui nei 8th Assam Rifles leh Mizoram Jounalists' Association (MJA) Serchhip District-te chuan nimin khan Assam Rifles NCO Club-ah inkawmna an nei.

He inkawmna ah hian 8th Assam Rifles-a Commandant Col. J. Mutum SM chuan ramri venna hna an thawhna kawngah tualchhung mite nena inkungkaihna tha neih chu an tum pakhat a nih thu leh chumi tur chuan mipuite tan thil tam tak an tih thu a sawi a, amah ngei pawh India hmarchhak mi leh sa a nih avangin mipui nunphung tam tak pawh a hriatthiam thu a sawi a, thalaiten hna an neih theihna tura hma an lak thin thu te, zirna lamah leh infiamna lamah pawh tualchhung mite chawikang tura hma an lak thin thute a sawi bawk.

He hunah hian MJA Serchhip District President, Kapliana Pachuau chuan Assam Rifles in Media Conclave an buatsaih chu lawmawm a tih thu leh, mipuite tana hna tam tak an lo thawh tawhnaah lawmthu a sawi a, chutihrual chuan mipuite tana Assam Rifles hnathawhte chu mipui in an hriat thin loh avangin mipuite nena inpawhna tha zawk a awm theih nan, Media kaltlanga an hnathawhte puangzar thin turin Assam Rifles hotute a sawm nghal bawk a ni.

Chanchinbu mite zawhna chhangin Col. J. Mutum chuan Myanmar leh India ramri, Champhai atanga Sangau thleng, KM 180-a thui chu an vil thu sawiin, Outpost 7 an nei tih a sawi a, tunhnaia khawchhak lama Assam Rifles-ten lirthei hrang hrang dap a, mipuite tana harsatna an siam thin nia sawi chungchang zawhna pawh chhângin, bungraw kârah drugs leh ralthuamte zeh tel a ni thin a, hetiang report an dawn hian lirtheite dap lo thei an ni lo tih a sawi a, tunah hian hetiang check-na tur khawl hi an chah mek tih sawiin, khawl a lo thlen hunah chuan tuna harsatna thleng thin tam tak hi a kian an beisei tih a sawi a, dân phal loha ram dang atanga bungraw lakluh chungchangah ramri atanga KM 16 chhunga awm chu Assam Rifles-ten an man thei a, KM 16 pawn lam chu Custom leh State Police-te kut a nih tawh thu a sawi bawk.

Assam Rifles hotute chuan May thlaa sipai lak runpui neih turah Serchhip Town chhunga thalai sipai tang duhte tan a thlawna Registration tih theih a nih thu sawiin, an Camp-a RO Office-ah zing dar 8:00 - 11:00 leh tlai dar 3:00 -5:00 chhungin document pawimawhte kengin registration an tihsak thei tih an sawi a. Serchhip-ah Boxing Championship buatsaih an tum thu leh Zoar Deprive Children Home-a naupang pali chu Boxing Training tura an sponsor tur thu an sawi a, an hmalakna hrang hrangte pawh an sawi bawk a ni.