Latest News

April 17-ah Assembly bye-election neih a ni dawn

Serchhip bial Assembly bye-election chu thla thar April 17 khian neih a ni dawn.

Election Commission of India chuan nimin khan thuchuah siamin Andhra Pradesh leh Karnataka State-a Parliamentary Constituencies pahnih leh State dang 11-a  Assembly Constituencies 14-a inthlanna neih hun tur hi a puang a, hemi ang hian Serchhip bial-a Assembly bye-election pawh April 17, 2021 khian neih a ni dawn a ni. Ruahman lawk ang chuan inthlanna neih tur atana hriattirna hi tun thla ni 23 khian tihchhuah a ni dawn a, inthlanna chuh tumte tan tun thla ni 30 thleng hming pekluh theih a ni anga, a tuk March 31-ah inthlanna chuh tura hming pekluh te chu enfiahin April 3 thleng inhnukdawk duh tan hun hawn a ni anga, April 17, 2021 (Inrinni)-ah mipui ten Vote an thlak dawn a ni. Heng inthlanna a Vote tla te hi May 2 khian chhiar a ni ang.

Serchhip bial-a Assembly bye-election neih hun tur puan a nih tak avang hian Election Model Code of Conducts chu hman nghal a ni bawk a. Electoral Roll Revision hnuhnung bera a lan danin 26-Serchhip (ST) AC-ah hian Polling Station 26 awmin General Voters mipa 9102 leh hmeichhia 10,194 an vaiin Vote nei thei 19,296 bakah Service Voters 190 an awm a ni.

Comments

Chhiar Hlawhte