Mizoram Engineering College-ah zirna tan theilo

Mizoram sawrkar hnuaia Engineering lam zirna In hmasa ber tur Lunglei Pukpui-a Mizoram Engineering College (MEC) chu a building tur sak zawh ni tawh mah se, tun thlengin zirna hi tan theih ala ni lova, he building hi Mizoram University, Southern Campus atana hman tir lailawk turin ruahmanna siam a ni.

Nilaini khan Lunglei-a MJA khawmpuia kal thuthar thehdarhtute chuan MEC hmunhma hi an tlawh a. He huna sawi a nih danin, MEC hi April ni 22, 2016 khan sak tan niin, November ni 16, 2018-ah sak zawh a ni a. Centrally Sponsored Scheme (CSS), Rashtriay Uchchatar Shiksha Abhiyan (RUSA) hnuaia New College (professional) dinna atana hmuh a ni a, a building te sakna atan hian cheng vbc. 26 zet sen niin, a satu te hi Mizoram Technocrats Company (MTC) Pvt. Ltd. an ni.

February 3, 2019 khan biak hmuh theih kaltlangin Prime Minister, Narendra Modi chuan India ram hmun hrang hranga Project 150 a hawn zingah MEC hi telin, February ni 28, 2021-ah contractor hnen atangin MEC enkawl hna hi State Project Directorate, RUSA leh Higher & Technical Education (H&TE) Department, Govt. of Mizoram kutah hlan a ni a. RUSA grant atanga sak, Engineering College tur building hrang hrang pariat (8) sak tawh a ni a. Tun dinhmunah a hmunhma leh building sak tawhte enkawl turin chowkidar pali rawih mek an ni a. Pukpui atanga College panna kawng, tui leh Campus tihenna (power supply) te a la awm lo bawk.

Thudawn danin, MEC-a zirna kalpui a nih theihnan hian mamawh hrang hrangte chu tihfel a la ni lo a. Engineering Course pathum- Civil Engineer, Electrical Engineer leh Mechanical Engineer te zir theih tura ruahman a ni a. A bultan nan Civil leh Mechanical Engineer te zir theih tura ruahman niin zirtirtu leh thawktu dang kum khat hlawh tur, Classroom leh Laboratory bungraw leina, Hostel leh Office mamawh hrang hrang hi RUSA State Project Directorate chuan kum 2018 khan siamin a tlem berah cheng vbc 3.43 sen ngai nia chhut a ni.

MEC-a zirna tan a nih theihna'n Mizoram State budget 2019-2020-ah H&TE Department demand hnuaiah Budget Head of account thar, MEC puala hawn belh tura dilna siam a ni a. A thawh khatnan chuan thawktu rawihna tur sum mamawh bakah, tui leh electric supply connection nen a vaiin cheng nuai 622.30 chu Finance Department-ah Mizoram budget 2019-20 a dah tura thlen ni mah se, Budget Head-a dahluh a nih theihnan hian Mizoram Finance Department atangin observation neuh neuh awm nualin, zawhna te pawh a channa thawn niin tun thlengin budget-ah erawh khung a la ni lo a. MEC Campus panna kawng hi NEDP sum chuang bang atanga siam tura Chief Minister hova bialtu MLA leh Department Officer te meeting in a lo rel tawh angin, kawng hi siam tura ngenna kum 2019 khan thlen a ni tawh bawk.

MEC tihchangtlun nana mamawh hrang hrang hi funding pe tura dil niin, approach road siamna tur Mizoram PWD Lunglei Division DRP siam chu 14th Finance Commission Terminal Year Funding hnuaiah Mizoram sawrkarin Priority list-ah dahin, hmu ngei tura beisei a nih laiin hmuh a ni ta lova. Funding Agency dang NEC-ah pawh sum mamawh dil a ni tawh a. 14th Finance Commission-ah zirtirtu Quarters 21 sak nan Rs. 10,10,00,000; Campus hungna tur leh chei nan Rs. 2,01,00,000 bakah Multipurpose Hall, Gymnasium leh Futsal Ground siamnan Rs. 7,19,25,000 thlen a ni tawh bawk.

Tunhnaiah MZU Southern Campus chu Lunglei District-ah din tura hmalak mek a nih thu thudawnna chuan a sawi a, Campus ram tur tihfel a, PG Class tanna tura mamawh infrastructure din a nih hun chhung hi a la rei deuh tura ngaih niin, chutih chhungin MEC building thenkhat hi MZU Southern Campus atana hman tir lailawk turin H&TE Department chuan a thuphungin a phal tawh nia sawi a ni.

MEC hi Engineering College tura duan a nih ang ngeiin MZU Campus-a subject tan tur zingah Engineering Course pakhat tal telh nise tih thu hi MZU hotute hnenah thlen a ni tawh niin thudawnna chuan a sawi.

MEC hi Mizoram sawrkar hnuaia Engineering lam zirna hmasa ber tur a nih angin tul leh mamawh hrang hrang buaipui ve zel niin thudawnna chuan a sawi a. A hma thei ang bera zirna pawh kalpui vat a nih beisei a ni a, a tlem berah zirna tan turin cheng vbc. 11.18 vel mamawh nia chhut a ni a, tun sawrkar hnuaia Flagship Programme, SEDP atanga beisei mek a nih thu thudawnna chuan a sawi bawk.