I&PR Minister in Group YMA Conference hmanpui

Information & Public Relation Minister, Lalruatkima chuan nimin khan Tuiphal Group YMA Conference vawi 47-na chu Chiahpui khua ah a hmanpui.

Chiahpui Community Hall-a Tuiphal Group YMA Conference-ah hian I&PR Minister chuan Tuiphal Group chu Mizoram ti hmingthatu mi tam tak lo chawrchhuahna a ni tih sawiin, zirna ngaisang thin Group an nihna chawinung zel tur leh ram leh hnam tana tangkai mithiam tak tak chherchhuak zel tura tan la thar turin a fuih a. Tunhma chuan nu leh pa ten fate an zilhna tawngkamah ‘Lehkha i zir loh chuan hna i thawk ang’ an ti thin tih sawiin, “Tunah erawh chuan hna thawk thiam turin lehkha i zir tur a ni, tih hi kan sawi dan tur a ni tawh zawk,” a ti bawk.

I&PR Minister chuan YMA chu tlawmngai pawl a ni satliah mai lo tih pawh sawiin, “Khawtlang nun hruai ngiltu, kan that tlanna tura mi zawng zawng rualkhai taka min kaihruaitu an nih avangin an hlu em em a. Tunhmain thangtharte kaihhruaina leh Zonun zemawi zirtirna hmun atan Zawlbuk kan nei thin a, hun lo inher danglam zelah kalphung thlak a ngai a, Zawlbuk chu Young Lushai Association in a thlak a, chu chu tunah Young Mizo Association kan ti ta a. YMA chu Zofate thlavang hauhtu, kawng dik zawh tura kaihruaitu a nihna hi kan chhawm nung zel tur a ni,” a ti bawk. Tuiphal Group YMA hnuaiah hian Branch 7 - Chiahpui, NE. Khawdungsei, Khawkawn, Lamzawl, Ngopa, Ngopa Hmar Veng leh Ngopa Chhim Veng Branch te an awm a ni.