'World Glaucoma Week' pualin hun hman a ni

Khawvel pumah 'World Glaucoma Week' hman mek pualin nimin khan Serchhip-ah pawh hun hman niin zirlaite tan kawngzawh huaihawt a ni bawk.

Tun thla ni 13 thleng awh tur 'World Glaucoma Week' puala inkhawm Serchhip Press Club a neih hi Serchhip CMO Office-a DEO, KC. Lalbiaknia chuan kaihruaiin Zosangpuii, Opthalmic Assistant chuan he huna kalkhawm te hi Glaucoma, Mit BP sang natna chungchang a zirtir a, Mit BP sang natna lanchhuah dan hrang hrang sawiin, Mit mu na leh sen ren rum te chu a lanchhuah dan langsar a nih thu sawiin, hetianga awm te chuan mahni-a inrinhlelh nachang hriat a pawimawh thu leh a khat tawka Mit enfiah tir fo chu ngaih pawimawh a tul thu a sawi a. Mit BP Sang chu a enkawlna man a san thu pawh sawiin, inven theih a nih laia inven chu a pawimawh thu a sawi bawk.

Hei bakah hian Mit enkawl uluk pawimawhna hrang hrangte sawiin, tunlai-a thir tanna khawl kan hman nasat avanga helam-a hnathawktute an fimkhur a tul thu sawiin, naupang infiamna avanga Mit chhia tam tak an awm tawh avanga fimkhur a tul thu a sawi bawk.

Nimin-a Serchip Press Club-a hun hman zawh hnu hian Govt. JM H/S Serchhip-a zirlaite nen he hapta hman mek puala kawngzawh neih niin zirlaite chuan Glaucoma natna chungchanga inzirtirna thuziak hrang hrangte an keng bawk a ni. Kumin a 'World Glaucoma Week' ah hian thupui atan 'The World is bright, save your sight' tih chu hman a ni.