Serchhip SP in NGO te a kawm

Serchhip District Superintendent of Police, Stephen Lalrinawma chuan nimin khan Serchhip District NGO Coordination Committee hruaitute a Pisa-a leng-ah sawmin khawtlang tana hmalakna tur hrang hrang an sawiho.

He inkawmna ah hian Serchhip SP, Stephen Lalrinawma chuan Mizoram sawrkar chuan Serchhip District-a SP hna chelh tura a rawn ruat angin March 2, 2021 khan a hna a rawn zawm ta tih sawiin, Police leh NGO ten thawhhona tha tak an lo neih tawh thin chu an neih chhunzawm zel theih a beisei thu a sawi a, mipuite himna atana Dan leh thupek kenkawhna kawngah Police, tlawmngai pawl leh mipui ten thawhhona tha tak an neih a beisei thu a sawi a. Serchhip Town chhung leh District chhung khaw hrang hrangah VDP tihnun leh thuamthat tum a nih thu sawiin, a theih anga an thawhho dawn thu a sawi bawk.

He inkawmna ah hian Serchhip Sub-Hqrs. YMA, MUP Serchhip District, MHIP Sub-Hqrs. leh MZP leh MSU Sub-Hqrs. Serchhip hruai-tute telin heng tlawmngai pawl hruaitute hian hmeichhia te chunga hleilenna kawnga theih-tawp chhuah a tul thu te, ruihhlo leh sualna dang dona kawngah tan lak a tul thu te, khawpui chhung hmun thenkhat ah Speed Breaker siam tul an tih thu te, Two Wheeler leh lirthei dang khawpui chhunga tlan chak lutuk thin thunun tul an tih thu te, Mizoram pawn atanga ruihhlo lo lut dona kawngah Police Out-Post siam belh leh Chhingchhip-a Police Out-Post awm mek tihchangtlun a tul thu te, Serchhip khawpui chhung Parking mumal zawka kalpui a tul thu leh kawngpui kam-a lirthei lian ten bungrua an hlanthlak hun mumal leh khauh zawka kenkawh a tul thu te an sawi a ni.

He hunah hian Serchhip District SP chuan  khawpui chhung Traffic Management chungchang ah kan mamawh anga hmalak a ni dawn tih sawiin, tlawmngai pawl ten thil tul leh mamawh an thlen hrang hrangte pawh a theih anga bawhzui a nih dawn thu a sawi bawk.