Latest News

Myanmar atanga raltlan nia insawi ten Serchhip District an rawn lut mek

Tunhnaia Myanmar-a tualchhung buaina thleng avanga rawn tlanchhia nia insawi mi pathum te chuan niminpiah khan Mizoram an rawn thleng a, nimin khan midang panga te pawhin Mizoram hi an rawn lut leh bawk.

Thudawn danin niminpiah-a Mizoram-a rawn lut mi pathum, Myanmar atanga rawn tlanchhia nia insawi te hi niminpiah chawhnu dar 1:00 vel khan Mizoram chhung, Serchhip District-a North Vanlaiphai Police Station huamchhungah rawn lutin Myanmar ramchhung-a Dawn khua atanga rawn lut niin an insawi a, heng mite hi tualchhung Police nia insawiin, tunhnaia Myanmar tualchhung buaina thlengah Police te chu mipuite leh Sipai inkarah dahin Civil mi te chu kutthlak tur leh a tul chuan ralthuam hmanga mipuite kap tura tih an ni tih an sawi a. Hei hi duh lovin Mizoram lamah an rawn tlanchhe ta tih an sawi a ni. Heng mite hian Bike hmangin midang in Tiau thleng an thlah tih sawiin, Tiau atang Balu la a kal Lungkawlh khaw Motor-ah an rawn lut ta tih an sawi a ni.

Heng mi pathum te hi Lungkawlh Community Hall-ah dah niin nizan hmasa khan an dinhmun enfiah in Rapid Antigen Test hmangin enfiah nghal an ni a, North Vanlaiphai atangin Police te leh District thuneitu ten a tul ang ang an buaipui nghal a ni.

Hetihlai hian nimin khan Myanmar atang hian mi panga te chu raltlanin Mizoram-ah an rawn lut leh nia thudawn a ni bawk a, Lungkawlh YMA hruaitute hnen atanga thudawn danin nimin-a Mizoram-a rawn lut te hi Sipai pathum niin Sipai pakhat hian a nupui leh a fa, nausen chu a rawn hruai thung a, an zinga Sipai pahnih te hi he thu buatsaih lai thleng hian Lungkawlh-ah la enkawl niin midang pathum, chhungkua te erawh hi chuan North Vanlaiphai-ah chhungte an nei tih sawiin, nimin vek khan North Vanlaiphai-a an chhungte bel turin an kal nghal nia thudawn a ni. Heti hian nimin tlai thleng khan Myanmar atanga raltlan nia hriat hi Lungkawl khua-ah mi 5 awm mekin North Vanlaiphai-ah mi 3 an awm ta bawk a ni.

North Vanlaiphai SDO (Civil), Dorothy Muansangi chuan heng ramdang atanga rawn lut te hi a tul anga buaipui an nih thu a sawi a, sawrkar thuneitu sang lamah a tul anga report pawh pek a nih thu a sawi a ni. Nimin vek khan Lungkawlh khaw VCP leh YMA hruaitute chu Serchhip-ah rawn kalin District thuneitute nen heng mite lo dawnsawn dan tur hrang hrangte hi an sawiho nia thudawn a ni bawk.

Comments

Popular News (Last 30 Days)