Latest News

COVID-19 Hri danna pek dan thlirletne neih a ni

State Task Force for COVID-19 Vaccination chu nimin khan thukhawmin an hmalakna hrang hrang an thlirlet bakah hmalak zel dan tur an sawiho.

COVID-19 hri danna (vaccine) pek dan tur ngaihtuahtu, State Task Force for COVID-19 Vaccination thutkhawm nimin-a SAD Conference Hall-a neih a tarlan a nih danin March ni 10, 2021 (Nilaini) thleng khan Mizoram-ah COVISHIELD dose 1,28,840 (January-ah 35,000, February-ah 75,400, March-ah 18,440) dawn a ni tawh a, Vaccine hi January leh February-ah vawi 2 ve ve dawn niin March thla ah vawi khat dawn a ni. Heng zinga dose 5110 hi Central sawrkar hnuaia thawkte tan ruahman a ni.

March ni 10, 2021 thleng khan Mizoram pumah Healthcare Worker 11,753 in vaccine 1st dose an la tawh a, an zinga 9797 hian 2nd dose an la tawh bawk a. Frontline Workers zingah 18,534 in 1st dose la tawhin an zinga mi 2 hian 2nd dose an la tawh a, kum 60 chunglam mi 10,199 in 1st dose la tawhin kum 45 - 59 inkar natna benvawn nei mi 825 in 1st dose an la tawh bawk a ni. Healthcare worker in register zinga 75% in vaccine 1st dose an la tawh a, Frontline workers zinga 1st dose la tawh hi 67% an ni bawk. Kum 2011 chhiarpui atanga chhutin kum 60 chunglam vaccine la zat hi 12.78% a ni.

COWIN 1.0-ah khan database a hming chuangte tan chauh vaccine hi dawn theih a ni a, March ni 1, 2021 khan COWIN 2.0 hman tan niin hetah hi chuan database hman a ni tawh lova, Healthcare Workers, Frontline Workers, kum 60 chung lamte leh kum 45 - 59 inkar natna benvawn nei (natna chi hrang hrang 20 chhinchhiah a ni) te tan Aadhar Card kengin Vaccine pekna hmuna an in register chuan pek nghal an ni a. Natna benvawn neite tan hian Doctor lehkha ken a ngai thung.

He hunah hian Vaccine 1st dose la tawh te tan an lakna hmun ngai (Vaccine Centre) ah kher 2nd dose lak a ngai tawh lo tih tarlan a ni a, Mizoram chhung leh pawna Vaccine Centre khawiah pawh 2nd dose hi a lak theih tawh a ni. Vaccine 1st dose la ten 2nd dose an lak tur hi vaccine dawn tawh sa atangin dahthat nghal zel a ngai a, vaccine hi sawrkar laipui atang dawn belh leh thuai beisei a ni bawk.

Thutkhawm-ah hian vaccine pekchhuah kawngah thawktu indaihlohna a nasat em em karah, COVID-19 volunteers engemawzatin hlawh beisei lova an la tanpui avanga an indaihlohna nasa taka chhawk zangkhai a nih chu lawmawm an tih thu tarlan a ni a. Vaccine pekchhuahna ah Tlawmngai pawl ten an tawiawm that avanga lawmawm an tih thu sawiin, hmun thenkhatah phei chuan YMA leh LLTF ten kum 60 chunglam ho kalna tur lirthei te an ruahman hial a ni tih tarlan a ni bawk.

Comments

Chhiar Hlawhte