Nursing School neih thuai a tul

Nursing School neih thuai a tul

Mizoram sawrkar hmalakna in kum engemaw zat kalta ah khan Serchhip-ah Nursing School tur sak niin a sak hna zawhfel a nih hnuah luah loh-a hun rei tak a awm leh avangin a building chu nasa taka tihchhiat a ni leh ta. Amaherawh chu nikum lamah hri leng avangin harsatna nasa tak kan tawk a, hri kai enkawl ngai tam tak a awm avangin he Nursing School building hi thuamtha in hri kai enkawlna hmun atan hman a ni zui ta a, he building hi tangkai taka hman a nih avangin hetiang building, hmanloh kan lo nei pawh a tangkai viau a, chutihrual chuan he building hi tangkai taka hman chhunzawm a nih theih dan tur hi ngaihtuah a tul hle a ni.

Kan hriat angin Mizoram-ah hian kan sawrkar sum tam tak senga building sak, a nihna anga hman zui takloh hi a awm fo mai a. Kan khawchhung ah pawh sawrkar sum tam tak hmanga Building sak, amaherawh chu sak zawh a nih atanga a nihna tur anga la hman miah loh hi sawi tur a awm nual mai a. Heng Building te hi luah lova a awm rei chuan nasa takin a tlabal a, hmang leh duh pawh ni ila sum tam tak sen belh a tul tawh thin a, tul lova sawrkar sum, mipui sum a luanralna tih loh theih a ni lo.

Tunah kan sawi mek Nursing School te pawh CCC atana luah tur khan sum tam tak sen belh a ngai a, amaherawh chu tunah hian thla khat dawn chu luah zui a nih leh tawh loh avangin mi tam tak chuan tlawh-pawh leh tawhin enkawl mumal lutuk loh in a awm leh mek tawh a. Hei vang hian kan sawrkar sum tam tak senral tawhna Nursing School hi a building a chhiat zel lohna turin a nihna tur ang taka hman a nih theih nan hmalak a tul hle a ni.