Latest News

Consumer te i harh ang u –XXVII :

Plastic lam chi hmang tlem rawh
(World Consumer Rights Day 2021)

- Laldinpuia

Secretary,

Serchhip District Consumer Association

March 15 hi kumtin ‘World Consumer Rights Day’ atana hman thin a ni a, he ni lo chhuah dan chu kum 1962 March 15 khan US President John F. Kennedy-a chua US Congress-ah thu sawiin Consumer rights chungchang hi a sawi a. Khawvel ram hruaitute zingah hetiang ti awmchhun a ni. John F. Kennedy-a’n Consumer rights chungchanga a hmalakna leh a ngaih pawimawhna hian Consumer movement hma a sawntir hle a, kum 1983 atang khan he ni hi ‘World Consumer Rights Day’ atan khawvel pumah hman a lo ni ta a, consumer te mawhphurhna chungchang leh thupui hrang hrang sawina hun atan hman a lo ni ta a ni.

Kum 2021-a World Consumer Righst Day thupui chu ‘Tackling Plastic Pollution’ tih a ni a. Khawvel pumah he ni hi plastic that loh zia leh plastic ina kan nuna harsatna a thlen tak dan te in hrilhhriata plastic lam chi hmang tlem tura inzirtirna hun atan hman a ni dawn a ni.

Plastic hi thil tangkai tak a ni a, a man a tlawm a, a dahsawn leh ken vel a awlsam bawk a, chuvang chuan mihring ten kan chhawr tangkai hle a, kan nitin khawsak phungah hian plastic lam chi tello chuan a khawsak hleih theih tawh loh a ni. Mi changkang apiangin plastic lam chi hman an uar a, plastic hman zawha paih leh mai theih (disposable) ang chi te phei chu puipunna leh mahni inchhungah pawh kan hman uar ber a lo ni ta a, kan mihring khawsak phung pawh a ti felfaiin a ti awlsam hle a ni. Mahse khing hmasawnna leh changkanna kan tih te khian kan nunphung a tih awlsam viau laiin kan hmalam hunah erawh harsatna namenlo min lo chhawp thung a, tun ang renga kan kal phei chuan kan tu leh faten tan he khawvel hi chenna tlakloh khawpa hreawm leh tawpah kan siam thei a lo ni tih hi mihtiamte ngaihdan a ni. Chuvang chuan Plastic hman tam hi changkanna kan tih thin kha dawt vek a lo ni a, Plastic lam chi hman tlem hi changkanna dik zawk a lo ni tih hi kan inzirtir thar leh a lo ngai ta zawk a ni.

Mithiam tena plastic in kan khawvel a tihbuai dan an chhuina a thil lo lang a chu hetiang hi a ni –

Kum 2050-ah chuan Tuifinriat-ah hian Sangha aiin plastic a tam tawh zawk ang.

Plastic lam chi tuipui-a kan paih thin avangin kumtin tui-a cheng thin nungcha 100,000 leh sava maktaduai 1 te an thi thin.

Kumtin plastic lam chi ton 8 a rit hi tuipui-ah paih thin a ni.

Plastic awm zawng zawng zatve vel hi vawikhat hmana paih leh chi (single use) a ni.

Plastic bottle te hi a reilo berah kum 450 vel chu an dam a, chu aia rei daih pawh an dam thei bawk.

Plastic hi a tawihral har hle mai a, mithiam tena an chhut dan chuan a tawihral hma thei ber Tui bottle hi kum 450 vel a dam an ti, plastic thenkhat te phei chu kum 5000 thleng dam te pawh an awm. Kan plastic hman hnu te kum heti zah an dam avang hian nitin plastic tam tak kan hman hnu kan paih zel bawk nen, tun ang renga kan kal chuan kum reilote hnuah chuan kan chenna khawvel hi plastic chhia in a la hnawk nuai dawn anih hmel. Plastic bag maktaduai 1 hi minute tinah khawvelah hman niin chhut a ni a, khawvela mihring te hian kum khat chhungin chawhrualin plastic bag 150 vel theuh hmang ang kan ni. Kum khat chhunga khawvela kan plastic bag hman hi zawmkhawm vek ta ila kan awmna lei hi vawi 4200 a vet chhuak thei dawn niin mithiam te chuan an sawi bawk.

Hetiang khawpa kan khawvel min lo tibuaitu, kan mithiam te lu tihaitu Plastic hi tunah hian a hman tlem khawvelin a inzirtir mek a. Mizoram ngeiah pawh plastic lam chi hi zawi zawia hman tlem anih zel theih nan sawrkar lam pawhin hma a la mek a ni. Kan tana thil tangkai tak emaw kan tih thin, kan nunphung a ti awlsam ti a kan lo fak vak vak thin kha kan tu leh fate rumna thlentu a lo ni thei reng mai tih hi kan ngaihtuah chian a tul ta hle mai. Chuvang chuan plastic lam chi hman tlem te, plastic vawikhat hmana paih leh mai theih ang chi hman loh te hi tunlai khawvela kan zirlai tur pawimawh tak a ni. Kan chenna khawvel hi chenna tlak, kan tu leh fate leh kan thlah te thlenga nuam taka kan siam zel theih nan Plastic lam chi hmang tlem ila, plastic hman hnu te i paih mai mai lo ang u.

Comments

Chhiar Hlawhte